Ikaduhang hugna sa bakona sa dengue ilusad

Sa ikatulong semana karong Disyembre, tinguha sa Department of Health (DOH) sa Central Visayas nga masugdan ang ikaduhang hugna sa pagpamakuna batok sa sakit nga dengue.

Si Dr. Shelbay Blanco, pangu sa Regional Epidemiology and Surveillance Unit (Resu) 7 sa DOH 7, nibutyag nga karong adlawa magtagbo og balik ang mga sakop sa National Immunization

Program aron tukion ang mga angay buhaton sa paghatag sa ikaduhang dose sa dengue vaccines.

Nakiglambigit usab sila sa mga opisyal sa panglawas sa mga siyudad sa Mandaue ug Lapu-Lapu nga maoy unang nakahatag sa unang hugna sa bakuna niadtong Hunyo.

Siya nibanabana nga 40 porsiyento lang sa 600,000 ka mga bata nga nagpanuigon og 9-anyos hangtod 14-anyos nga target populasyon nga hatagan, ang nabakunahan sa unang hugna.

Matod ni Blanco nga hayan mabalibaran ang mga bata nga wala mahatagi og bakuna sa unang hugna, apan kini ila pang tukion atol sa ilang tigom.

Sa record sa Resu 7, nasayran nga niabot na og 12,098 ang mga kaso sa dengue sa Central Visayas gikan sa Enero hangtod sa Nobiyembre 25, 2017. Sa maong ihap, 108 ang nangamatay.

Kini 52 porsiyento nga ubos kon itandi sa samang panahon sa miaging tuig nga niabot og 25,466 ang mga kaso ug 221 ang nangamatay.

Kadaghanan sa mga kaso natala sa mga siyudad sa Sugbo (2,455 cases, 31 namatay), Lapu-Lapu (1,088 cases, 11 namatay), Mandaue (849 cases, 2 namatay), ug Talisay (453 cases, 11 namatay). Kasagaran sa mga nagka- dengue kay nagpangidaron og usa ka tuig hangtod 5-anyos.

Ang dengue gikan sa lamok nga nagdala og virus, hinungdan nga kabahin sa kampanya mao ang pagyabo sa mga tubig nga kapuy-an sa lamok.

The vaccine will not be effective if wala ka makasugod ug dili makakumpleto” Dr. Shelbay Blanco