KALIKUPAN NGA NAGPANGAMAY SA CANGCUA-AY

Nakakita kana ba og

beach resort kansang mga inprastraktura nagtapot sa pangpang ug ang hagdanan nagsubay sa bukid?

Kon wala pa, bisitaha ang Cangcuaay Private Beach (CPB) sa Barangay Tan-awan, walo kilometros gikan sa munisipyo sa lungsod sa Oslob diin nabantog ang Whale watching.

Inig abot nimo sa lugar, imong makita ang signage duol sa covered parking area sa CPB apan inig naog sa hagdanan nga adunay 245 ka ang-ang, imong masud-ong ang katahom nga iya sa kina-iyahan.

Sa ibabaw nga bahin, imong makita ang isla sa Sumilon ug lalawigan sa Siquijor diin mosugat sa imong mga mata ang labihan ka blue nga tubig sa dagat ug ka green sa kalikupan.

Pinaagi sa entrance fee (day use) nga P120 alang sa mga dagko ug P50 alang sa 10 anyos paubos (libre ang masuso) imong mapahimuslan ang pasilidad uban sa serbisyo sa mga mapahiyumon ug buotan nga staffs sa CPB. Sa overnight, P350 ang matag tawo kon adunay kaugalingong tent apan P520 kon ang CPB pa ang motanyag sa tolda. Sa entrance fee, libre na ang paggamit sa mga cottage, comfort room, shower ug labaw sa tanan way

corkage ang mga pagkaon gikan sa gawas ug adunay nindot nga lutoanan.

Ang CPB adunay puti nga bas, diving board ug adunay mga dagkong bato nga mahimong patungan alang sa selfie.

Si Vilma Lañas Fernandez, tag-iya ug tagdumala sa CPB, nagkanayon nga pahuwayanan ra nila uban sa iyang bana nga Norwegian national apan gumikan sa demand sa publiko ila kining gi- commercial sugod niadtong 2015. Kon adunay guest nga gustong mogamit og private room, nagkantidad kini og P4,500 ug P2,000 alang sa duha ka guest nga adunay aircon ug hot and cold shower unya libre ang pamahaw.

Matod pa ni Fernandez nga pipila sa mga VIP guest

sa CPB mao ang finance minister sa Thailand niadtong Oktubre 26 ug 27, naka check-in na usab ang mga artista nga silang Lara Quigaman ug Mylen Dizon sa show business. Gipadayag sa tag-iya sa resort nga sa umaabot nga tuig, motukod sila og mga room alang sa mga bisita kansang presyo maabot ra sa bulsa.

Gipahibawo ni Fernandez nga diha sa iyang beach nagagikan ang mga higanteng whale sa wa pa mapalambo sa Oslob ang Whale watching sa Barangay Tan-awan (1.2 kilometros gikan sa resort) sanglit sa maong lugar adunay dagkong tubod sa fresh

water diin nabuhi ang mga uyap nga maoy kinaham nga kan-on sa mga butanding. /