Armas sa pagbawos
Sukad si kanhi presidente ug karon Manila Mayor Joseph Estrada gisuwayan pag-impeach, kanunay nang hulga sa nagsunod nga mga administrasyon ang impeachment complaint batok sa dagkong mga opisyal sa nasod nga impeachable. Daghan na ang ningsuway, apan anha pa lang sa komitiba sa Ubos Balay Balauranan, gipatay na kini.
Sa pag-asumer ni kanhi presidente Benigno Aquino III, naigo gilayon si anhing chief justice Renato Corona, kinsa nanalipod pa sa iyang kaugalingon atubangan sa mga magbabalaud, apan wa na siya makapiog sa gahom sa kanhi administrasyon kay duna silay numero sa duha ka mga balay balauranan.
Gawas kang Corona, gisuwayan usab unta pag- impeach si kanhi Ombudsman Merceditas Gutierrez, kinsa napugos sa pagluwat sa katungdanan tungod sa pressure sa pag-asumer sa kanhi presidente.
Bisan si kanhi presidente Gloria Macapagal Arroyo wa makaeskapo, apan kay duna man siyay numero sa mga magbabalaud sud sa katuigan nga siya ang nagtimon sa nasod, wa siya matarog sa impeachment complaint.
Karon si Chief Justice Maria Lourdes Sereno nga tinudlo ni Aquino mao na usab ang gisuwayan karon pag- impeach sa Ubos Balay Balauranan.
Bisan tuod kon di makita direkta ang mga kamot ni Presidente Rodrigo Duterte, ang iyang mga kaalyado dayag nga nagtinguha sa pagtangtang sa katungdanan sa chief justice.
Dihang si Estrada napalagpot sa katungdanan pinaagi sa People Power nga nisunod sa impeachment trial, daghan ang nagtuo sa kaanindot sa mao nga proseso.
Apan ang nahitabo, gigamit na kining armas sa pagpanglutos ug pagpanimawos niadtong naa sa katungdanan batok sa ilang mga kaatbang. Naa may basehanan o wa, kining nahitabo karon ni Sereno panimawos na sa mga kaaway ni Aquino.