Makalipay ni Mayor Osmeña

Ginaingon nga ang mga Pinoy usa sa labing malipayon nga mga tawo sa tibuok kalibotan. Gani, bisan sa namatyan, sigi ang inom ug katawa sa mga komedya nga kadaghan na balik-balika.

Di kay wa magtahod sa namatay. Kay ang mga komedya di man maghisgot sa mga butang nga daotan mahitungod sa tawo nga mitaliwan na sa laing kinabuhi agig respetar kaniya.

Bisan ang kontra morespetar sa namatay. Morag kadtong estorya sa usa ka huwes nga di siya motambong sa lubong sa iyang kontra nga politiko pero magpadala siyag suwat nga dako siyang uyon sa paglubong sa iyang kontra.

Apan lahi si Cebu City Mayor Tomas Osmeña. Yano ang iyang pagpadayag sa iyang kalipay nga namatay si Barangay Kapitan Imok Rupinta sa Ermita.

Si Rupinta napatay human banhigi sa upat ka wa mailhing mga tawo nga nagsakay sa duha ka motorsiklo samtang nagmaneho sa iyang pick-up didto sa Tayud, Liloan niadtong miaging Huwebes sa gabii.

Kinsay nasayod nga ang iyang kamatayon makalipay ni Mayor Osmeña?

Daling gikondinar sa mga sakop sa Barug Team Rama ang pamahayag sa mayor nga gikalipay niya ang kamatayon ni Rupinta. Nagsul-ob silag itom nga arm band pagpakita sa ilang pagbangutan.

Apan matod pa ni Osmeña, di lang ang kamatayon ni Rupinta ang makalipay kaniya. Nalipay sab diay siya sa pagkamatay ni kanhi Barangay Kapitan George Rama.

Ngano man? Matod pa ni Osmeña sigig estorya si George Rama nga hapit na siya mamatay apan si George Rama man maoy namatay.

Bisan si Senate President Aquilino “Koko” Pimentel III nikondinar sa pamahayag ni Osmeña nga nalipay siya sa pagkamatay ni Rupinta.

Matod pa ni Pimentel si Imok Rupinta usa ka “dedicated public servant who was loved by the masses.”

Prangka ra tingali kaayo si Osmeña. Pero mas grabe ang iyang pasangil nga may kalambigitan ang namatay sa illegal nga drugas sa iyang barangay. Di ba kinaiya man unta sa mga Pinoy ang paglikay paghisgot sa mga butang daotan bahin sa namatay nga di na makapanalipod sa iyang kaugalingon?

Daling gikondinar sa mga sakop sa Barug Team Rama ang pamahayag sa mayor nga gikalipay niya ang kamatayon ni Rupinta.