MMFF na pod
Disyembre na gyud. Pila na lang ka katulog, Pasko na. Nakapangandam na mo? Sa ako nang nahisgutan sa una, naghimo kog kaugalingong lagda nga mopatokar og mga huni ug awit sa Pasko sugod sa Dis. 1 lang gyud. Ug kay Dis. 1 na man, hapit tanang madungog sa akong player awit sa Pasko ra gyud.
Laing lagda mao ang pagtaud og dayandayan sugod sa Dis. 1 ra gihapon. Pero tungod kay wa pa man koy katauran (kay wala pa mahuman, hehe!), i-angan-angan o unya sa sunod tuig na ba lang gyud himoon.
○○○ Usa sa mga giatangan sa mga makisine kon Disyembre na mao ang Metro Manila Film Festival. Kon sa una, nag-uban sila si Vice Ganda ug Coco Martin sa usa ka pelikula, karon magkontra sila.
Si Vice anha sa pelikula sa Star Cinema samtang si Coco anha sa iyang kaugalingong production company. Siya ang bida ug ang direktor mismo. Bongga!
Atong tan-awon unsa na usab nga pelikulaha ang mohakot ug dakong kita sa takilya. Ingon man kon kinsa usab ang mohakot sa mga pasidungog. Huwaton lang nato.
○○○ Usa ko sa medyo nasubo sa pagkabasa nako nga dili na si Christian Bables ang modala sa papel nga Barbie (mao ba to ni?) nga maayo kaayo niyang pagkadala sa pelikula sa niaging tuig diin si Paolo Ballesteros ang bida.
Ang pelikula mao ang Die Beautiful. May spin off nga pelikula o kanang gibase sa nahaunang proyekto. Kini ang Born Beautiful.Pero kon ang akong nabasahan nga gibalibaran sa management ni Christian ang role ang atong tuohan, medyo sub okay nakadaug baya gyud si Christian og award tungod niini.
Pero maayo man sab nga aktor ang mopuli niya, si Martin del Rosario. May mga hungihong nga nagduda sa pagkalalaki ning Martin. Gani may niingon man nga iya nang gipahibalo kon unsa gyud ang iyang tinuod nga pagkatawo (wa hinoon ko makaseguro
kon tinuod ba ni). Kining pagdawat ni Martin sa maong papel, nagpasabo na ba kini nga mao na gyud ni? Mangambot lang ko. ○○○ Nakatambong na kog mga Christmas parties alang sa media nga gidalit sa dagkong mga kompaniya pero, so far, wa pa koy nadag-an nga premyo nga matawag natong bonggang bongga. Pero may umaabot pa man. Naa na kaha ning at least duha ka parties ang akong gipaabot. Manghinaut lang ko.