TABAL NAGPANIKAD NA
Ang pagdepensa sa iyang kampyonato ug ang dugang pagpalig-on sa kasaysayan nga iyang nakulit maoy prayoridad sa Sugboanong Olympian marathoner Mary Joy Tabal sa dihang mobuto na karong Dominggo ang starting gun sa national finals sa 41st National Milo Marathon nga manukad atubangan sa Cebu Normal University, Osmena Boulevard, dakbayan sa Sugbo.
Kini maoy gibutyag ni Tabal atol sa press conference kagahapon sa Cebu Grand Hotel nga gitambungan usab sa pipila ka mga representatives sa mga ahensiya sa dakbayan sa Sugbo ug sa siyudad sa Mandaue nga miayuda sa tinuig nga lumba.
“My priority is to defend my title. Secondary lang nang pag-break sa akong record last year. And also to become the first to win the national title for
the five consecutive years,” matod ni Tabal kinsa niadtong Lunes niabot gikan sa iyang training didto sa Italy.
Bisan tuod og anaa siya sa saktong preparasyon, giangkon ni Tabal nga usa ka malisod ug mahagiton nga rota ang ilang sagubangon karon tungod sa kadaghan sa likoon niini.
Ang rota nga motadlas sa pipila ka hagip-ot nga dalan sa Mandaue maoy nagsilbing ikaduhang option sa mga organizers human si Cebu City Mayor Tomas Osmeña miluwat og memorandum nga dili na ipagamit ang naandan nga South Road Properties sa mga lumba sa dagan tungod sa grabing ka- huot sa trapiko mugna sa nagpadayon nga construction sa underpass sa may Basak-Mambaling, siyudad sa Sugbo. Si Ricky Ballesteros, ang local chief organizer sa maong event, miangkon nga kini maoy unang higayon nga ang rota sa mga lumba sa dagan mahiagi ning pipila ka mga dapit. Hinuon matod niya nga uban sa pag-abag sa mga traffic enforcers, mga barangay officials, Department of Public Works and Highways, nga
marshalls ug ubang mga ahensiya sa dakbayan sa Sugbo ug Mandaue, maglampuson ang maong kalihukan. Kini maoy una usab nga higayon nga ang Cebu maoy host sa Milo National finals.
Gibanabana nga moabot ngadto sa 20,000 ka mga runners nga gibahin ngadto sa lima ka kategoriya nga naglakip sa mga inila ug tang-ang nga mga partisipante ang motubag sa pagbuto sa starting gun.
Gawas sa 42 kilometer run, aduna usay kategoriya alang sa tulo ka kilometro, lima ka kilometro, 10 ka kilometro ug 21k.
Matod ni Tabal nga dili lang ang iyang saktong preparasyon kon dili hasta na usab ang igong kasinatian sa rota isip Sugboanon maoy naghatag usab kaniya og bintaha.
Ang lumba nga sugdan sa alas 3 sa kadlawon motapos sa Cebu City Sports Complex.