WARRIORS NAKAIPSOT
Human nga taodtaod nga nagkasalimuang sa ilang opensa, mipabuto og duha ka dinaliang triples si Stephen Curry nga nakapa overtime ug maoy nahimong yawe sa munasaginhawang kadaugan sa Golden State Warriors batok sa batan-ong Los Angeles Lakers, 127-123, sa NBA kagahapon.
Tungod niini, napakgang sa Warriors ang nag-ong-ong nga ikaduha unta nilang sunodsunod nga kapildihan nga maoy primero nila ning nagpadayon ga season.
Si Kevin Durant maoy nangulo sa Warriors nga may 29 puntos, samtang si Curry nmidalit og 28 ug 20 usab ang natampo ni Klay Thompson.
Nanginit og maayo si Curry sa overtime ug dinhi niya nahagpat ang 13 sa iyang kinatibuk-ang puntos.
Sa pildirong Lakers, si Brandon Ingram mipabaha og 32 puntos nga maoy iyang careersamtang tag 21 usab sila si Kentavious Cladwell ug Julius Randle. Ang ilang rookie nga si Lonzo Ball mitapos sa duwa nga may 15 puntos ug 10 ka assists.
Dumadaog na unta ang Lakers sa regulation period apan nasipyat si Ingram sa iyang katpusang lay-up.
Samtang didto sa Florida, mipabuhagay og 40 puntos ug milangkat og 15 ka rebounds si Aaron Gordon aron iduot ang Oklahoma City Thunder ngadto sa ilang ikalimang nga kapildihan, 121-108, sulod sa unom ka uwahi nilang duwa.
Perming naglabaw ang Orlando, apan ang dakong rally nga gipabuto sa Thunder nga gipaulbohan sa 20 puntos ni Westbrook sa fourth quarter naghatag kanila og dakong hudlat,
Sa kinatibuk-an, si Westbrook adunay 37 puntos, 11 ka rebounds, lima ka assists ug lima ka steals apan wa gihapon kini magsilbi gumikan sa kakuwang og suporta sa kaubanan. Si Elfrid Payton midugang og 19 alang sa Magic.
Si Paul George mitali og 22 puntos alang sa Oklahoma City kinsa maoy mo- host sa Minnesota Timberwolves ugma samtang ang Orlando bisitahon sa Golden State Warriors.
Sa laing mga duwa, ang Houston Rockets mibungkag sa Indiana Pacers, 118-97, ubos sa pagpangulo ni James Harden nga may 29 puntos, 10 ka assists ug walo ka rebounds.
Ang San Antonio Spurs mipaampo sa naghingutas usab nga Grizzlies, 104-95. Si LaMarcus Aldridge mitapos sa duwa nga may 41 puntos, ang Timberwolves midabo-dabo sa Pelicans, 120-102, ug gipabugnaw usab sa New York Knicks ang kainit sa Miam, 115-86.
Gibuntog sa Philadelphia Sixers ang Washington Wizards, 118-113, ug gipasawop sa Detroit Pistons ang Phoenix Suns, 131-107.
Wa usab magpabitin ang Raptors ug ilang nakulatahan ang Hornets, 126-113, ug maayong pagbaling sa Brooklyn Nets ang Dallas Mavericks, 109-104.