ERMITA DUNAY BAG-ONG KAPITAN
Nanumpa na ang bag-ong kapitan sa Barangay Ermita walo ka adlaw sa di pa ihatod sa lubnganan si si Kapitan Felicisimo “Imok Rupinta” kinsa gi-ambush patay sa lungsod sa Liloan.
Si Kapitan Mark Miral, kinsa maoy number one councilor sa Ermita, nanumpa kang Judge Macaundas Hadjirasul sa Regional Trial Court Branch 8 sa siyudad sa Sugbo kagahapon sa buntag isip timailhan sa iyang pag-asumir sa katungdanan nga gibiyaan ni Rupinta.
Si Miral di unta moasumir sa katungdanan isip kapitan ug huwaton nga malubong si Rupinta apan gumikan sa panginahanglan, nasayo iyang paglingkod.
Si Bise Mayor Edgardo Labella nibutyag nga gumikan sa daghang pirmahanan sa Office of the Barangay Captain, kinahanglan na siyang molingkod aron moirog ang transaksyon.
Ang bise mayor kinsa nitambong atol sa pagpanumpa ni Miral uban sa unom ka mga konsehal sa Ermita, niawhag sa batan-ong kapitan nga ipadayon ang mga maayong legasiya sa kanhi kapitan sama sa tiunay nga pagserbisyo.
“Kinahanglan siyang maminaw og unsay yangongo sa tagi barangay nga ang usa ka lider di para momando kon di maminaw ug moserbisyo sa iyang katawhan,” padayag ni Labella.
Si Mayor Tomas Osmeña nagkanayon nga padayon karon nilang gi-monitor kon si kinsa ang mosunod sa pagkolekta sa tag P10 nga voluntary donation sa mga vendor nga iyang gihulagway nga illegal.
Apan niadtong buhi pa si Rupinta, siya niingon nga ang ilang koleksyon gamiton sa pagpalit sa spare parts sa barangay vehicles sama sa garbage truck, fire truck, ambulance ug uban pa sanglit mao kini ilang madalidali para di maparalisar ang pagtunol sa batakang serbisyo.