Pagbakuna sa dengue vaccines gihunong

Nakaginhawa og lawom si Provincial Health Officer Dr. Rene Catan sa pagsuspenso sa Department of Health kagahapon sa P3 bilyones nga dengue vaccination program niini human sa bag-ong analysis sa pharmaceutical nga kompaniya nga naggama sa bakuna, Dengvaxia.

Si Health Secretary Francisco Duque nipapahunong una sa paghatag sa dengue vaccines hangtod makakuha og rekomendasyon gikan sa World Health Organization (WHO) aron dunay technical ug scientific nga basehanan ang rekomendasyon nga ilang ipatuman.

Matod ni Catan nga ningpaluyo kini sa suspension sa pag-apud-apod sa bakuna batok sa dengue tungod kay alang niya duna pay mga pangutana nga angay tubagon ang manufacturer sa dengue vaccine sa kaepektibo niini.

“I stood on my position that there are still some issues on the vaccine that have not been answered by the manufacturers,” sumala ni Catan. Siya nasubo nga giapudapod gihapon sa DOH ang bakuna bisan kon wala pa matubag ang pipila ka mga issue kalabot niini.

Siya nabalaka sa posible mahiagoman nga sakit sa kabataan nga nabakunahan na niini sa unang hugna apan nga wala pa magka-dengue.

Ang Sanofi Pasteur, ang French manufacturer sa labing una nga bakuna batok sa dengue sa kalibotan, nipagawas og bag-ong analysis sa long-term clinical trial data sa bakuna nga Dengvaxia.

Sa usa ka pamahayag, kini niangkon nga dugang mga kaso sa grabe nga sakit ang mahiagoman sa tawo nga mabakunahan sa maong dengue vaccine kon wala pa kini matapti og dengue.

Ang Sanofi nidugang nga moawhag kini sa mga awtoridad sa panglawas nga pahibaw-on ang mga doktor ug pasyente sa bag-ong impormasyon sa mga nasod diin ang bakuna gitugot nga ibakuna.

Ang DOH nipalit sa Dengvaxia alang sa usa ka milyon ka mga bata sa publikong mga tunghaan sa mga dapit diin taas ang mga kaso sa dengue sa 2015: National Capital Region, Region 3, Region 4A ug Central Visayas.

Sa rehiyon, ang bakuna nasugdan na og hatag ngadto sa mga bata nga nagpangidaron og 9 hangtod sa 14-anyos sa Sugbo diin ang mga siyudad sa Mandaue ug Lapu-Lapu nga maoy unang nakahatag sa unang hugna sa bakuna niadtong Hunyo ning tuiga. /