Drayber sa taxi nga gireklamo nga nangayo og dakong pleti gipatawag sa LTFRB 7, wa motunga

Wa mopatim-aw ang drayber nga gipasanginlan nag- overcharging sa iyang mga pasahero ug ang operator niini sa Gilgal Taxi sa gipatawag nga hearing kagahapon sa buntag sa Land Transportation Franchising and Regulatory Board sa Central Visayas. Si Isidro Tumulak, Jr., assistant spokesman sa LTFRB 7, nibutyag nga niisyu na sila og show cause order batok sa operator sa Gilgal Taxi ug gipatubag kon nganong dili angay kanselahon ang prangkisa niini nga adunay 34 ka taxi units.

Suma pa niya kon unsay sala sa drayber mao usab ang tulubagon sa operator og taxi.

“Ang operator nahibawo sa drayber ug nakaila kon unsa kini matanga sa pagkadrayber,” matod ni Tumulak sa pakighinabi sa Superbalita Cebu kagahapon.

Usa ka representante sa Gilgal Taxi nga wa magpahingan niingon nga tubagon sa kompaniya ang pasangil batok sa ilang drayber.

Ang wala pagpakita sa drayber nga si Jack Espanto nga nagmaneho sa taxi (AAE 5719), matod ni Tumulak, makonsiderar nga sad-an kini sa reklamo batok niini.

Si Tumulak nitug-an magatubang og multa nga P8,000 ang operator samtang P18,000 ang drayber.

Matod niya, kon ang video ang basehan, ang drayber nakalapas sa overcharging, gross

discourtesy ug wala pagsul-ob og uniporme.

Sa video, siya nidugang, makita nga sobra ang gipangayo nga plite sa drayber sa iyang langyaw nga mga pasahero.

Usa ka Almalyn Salimbagat Pancho ang ni- post sa iyang Facebook page niadtong Nobiyembre 29 sa alas 10:11 sa buntag ug nipasangil sa taxi drayber nga naningil og P2,000 nga plite sa langyaw nga mga pasahero.

Si Pancho niasoy ning mantalaan nga mga Hapon ang mga pasahero nga niabot sa Sugbo niadtong Nobiyembre 27 aron mag-honeymoon ug pagka Nobiyembre 28 nagpahatod sila sa SM Seaside sa dakbayan sa Sugbo gikan sa usa ka hotel sa siyudad sa Lapu-Lapu.

Siya nitug-an ang usa sa mga Hapon ang nikuha sa video ug nipadala niya isip ilang tour guide.