Marijuana ni Albano

Dunay nag-ong-ong karon nga balaodnon sa balay balaoranan nga kon mapasar mahimo na unyang mag-legalize sa marijuana isip usa ka tambal. Ang House Bill 6517 kon gitawag og Philippine Compassionate Medical Cannabis Act nga gipangamahanan ni Rep. Rodolfo Albano III sa unang distrito sa Isabela magila na unya sa marijuana nga usa ka tambal.

Sa ato pa, dayag na unya ug dali na kining mapalit sa mga drug store o botika nga dili na ka pangulbaan ang tiggamitan niini kay wala na may modakop kanila.

Ang balaodnon posibling gikopya ni Albano sa ubang nasod nga nag-legalized na usab sa marijuana kay lagi usa kuno ka tambal. Kining maong balaod gibase sigon sa ilang pagtuon.

Pero dinhi sa Pilipinas, lahi ang senaryo. Ang tinud-anay nga panghitabo maoy gihimong kapasikaran aron nga ma-illegal ang marijuana.

Ang panghitabo nagtumbok nga ang paggamit og marijuana mao usay hinungdan sa mga krimen ug kadaot. Tungod niini, namugna ug napalabang ang balaod nga naglakip sa marijuana sa mga gidili ug illegal nga mga drugas sama sa shabu, cocaine ug herione.

Napasar ang Republic Act 9165 o gitawag og Comprehensive Dangerous Act niadtong tuig 2002.

Mao nga kahibulongan kining gihimo ni Albano kay imposibli nga wa siya masayod sa kadaot nga nahimo sa marijuana ngadto sa atong kabatan-onan.

Kon duna siyay nakita nga kaayohan, iya usab untang lantawon ang kadautan nga mamugna niini. Kay sa pagkatinuod lang, dili malikayan nga kini dili maabusohan.

Dili kaha mahimong kataw-an ang administrasyong Duterte nga lunod patayng nakigbatok sa gidiling drugas unya nia diay balaod nga naghatag og lugway sa mga tawong adik nga mao na unya ang maghatag og dugang hulga sa seguridad sa publiko?