22 ka adlaw na lang Pasko na!

Usa ka mainitong pagbati alang sa usa malinawon ug malipayon nga Pasko 2017. Sama sa nangaging mga Pasko daghan ta og mga panghinaot.

Karong paskoha gusto nakong pahimug-atan ang atong mga OFW kun Overseas Filipino Workers nga posibling nagdanga-danga na ron sa mga tugpahanan ug naghinamhinam na nga ikauban ang ilang mga minahal sa kinabuhi sa adlaw sa Pasko.

Nahinumdum man gud ko niadtong tuig nga daghan sa atong mga OFW ang napagan sa nagkadaiyang krisis nga nahiaguman sa mga nasod diin sila nagtrabaho.

Diha man gani to’y higayon nga ang mga OFW nga namauli kay nanira ang mga kompaniya nga ilang gitrabahoan nangaplay pagka polis.

Apan di ni mao ang punto nga gusto nakong i-asoy ning panahon nga nagka duol na ang Pasko.

Ang mga OFW nga nagdamgo unta makauban ang ilang pamilya ning dakong selebrasyon apan tungod sa trabaho kutob nalang sila sa pagdamgo. Ang giilang mga bayani sa bagong panahon ang uban nila di pa makapauli tungod kay wa pa matapos ang ilang kuntrata.

Di ni sayon kay ang tanan gusto man gyud unta nga naa sa ilang kiliran ang ilang mga asawa, bana ug anak samtang gisaulog ang Pasko.

Galing lang tungod sa mga obligasyon sa gawas sa nasod kutob nalang sila sa pag text, tawag ug pag gamit sa social media pagpadangat sa ilang mga mensahe.

Duna sab ta’y daghang OFW nga nakasugat ug mga problema sa ilang panarbaho.

Sila maoy labaw nakong gikabalak-an. Sayod ta nga dunay daghan nila ang nanimpalad sa gawas nga may kakulian sa mga dokumento.

Ang uban nag-atubang pa gani og mga bug-at nga problema nga maoy hinungdan nga daghan nang Pasko ang nanglabay nga wa gyud sila makapauli.

Usa ni sa akong gipanghinaot nga unta ning panahona napangitaan na og sulbad ug gawasnon na sila nga makapauli sa ato.

Sa mga hingtungdang pamilya unta di mo kawad-an sa paglaum nga pinaagi sa pag-ampo ug tabang sa gobyerno mapadali pagsulbad ang mga kakulian nga giatubang sa inyong mga minahal sa kinabuhi nga OFW.

Duna sa’y laing problema ang ubang pamilya. Kini may labot sa ilang mga claims sa mga kompaniya ug sa gobyerno mismo nga dugay na gipaabot. Nagka utang utang na nga niresulta sa pag undang sa eskwela sa mga anak.

Naa po’y uban wa na maabti ug pundo sa ilang binuwan nga dawatunon sa wa pa sab matino nga hinungdan. Looy kaayo ang nagpaabot.

Apan duna sa’y nagsige ug padala apan wa na’y nahabilin.

Busa ning Pasko nga atong saulogon palihug di nato kalimtan ang mga OFW sa pagpanghinaot nga unta sama sa mga nia ra sa Pilipinas nagtrabaho sila makabaton ug kamaya sa ilang tagsa tagsa ka kasing kasing.