The love of my life

Milabay na lang ang usa ka buwan sukad sa paglarga ni Ronron kuyog ang iyang mga ginikanan sa Amerika, wa gyud motawag si Ronron nako. Nadugangan ang gibati kong kaguol ug frustration. Di kalikayan nga makahunahuna ko nga wa na tingali pagmahal si Ronron nako.

Apan usa ka buntag, gipahibawo ko ni Mama nga mopauli na si Ronron. Puwerte nakong lipaya.

“Nagtawag ang inahan ni Ronron nako kagabii, Digna, nga unyang hapon mahiabot na sila si Ronron dinhi sa ato. Karong buntag lang tika pahibaw-a.” “Magkita na gyud mi si Ronron, Ma. Gimingaw na kaayo ko niya.”

Nagluha-luha ang akong mga mata sa kalipay. Nakagakos ko kang Mama. Nabatyagan ko na sab ang iyang paghapuhap sa akong bukunga sa akong paminaw hapuhap sa pagpangga.

Unya mibiya si Mama nako. Bisag nagtalikod na siya nako, morag naghilak siya kay namahid man siya sa iyang mga mata. Apan wa ko na lang hunahunaa pag-ayo ang akong namatikdan kang Mama. Tingali, nakahilak sab siya sa kalipay kay nakita man niya ako kon unsa kadako ang gibati kong kalipay niadtong tungora.

Wa gyud ko molakaw niadtong adlawa. Naghuwat ko sa pag-abot ni Ronron. Diha ko sa among terrace atbang sa balay nila ni Ronron. Nakita ko nga dunay mga kaliwat nila ni Ronron nga misulod-gawas sa ilang balay. Morag busy kaayo sila. Nahunahuna ko na lang nga basig naghikay sila tungod sa pagpauli na nila ni Ronron.

Pagka hapon, gikulbaan ko. Apan nagtuo ko nga ang mao kong gibati tungod sa dako kong kahinam nga magkakita ug magkaestorya na gyud mi si Ronron. Dako ang akong pagtuo nga naayo na siya sa iyang sakit aning mga higayona.

“Pahuway una sa imong kuwarto, Digna.” Miduol si Mama nako. “Anhi lang ko dinhi, Ma. Huwaton ko si Ronron.

Wa na magtingog si Mama. Apan wa siya mobiya nako. Naglantaw siya sa balay nila ni Ronron. Unya dunay nahiabot nga funeral car ug mihunong kini sa tungod gyud sa gate sa lawn nila ni Ronron. Misamot kakusog ang gibati kong kakulba labi na nga gipagawas ang usa ka lungon gikan sa funeral car ug gibayongan kini sa upat ka tawo ug gipasulod sa lagwerta sa balay nila ni Ronron.