KAINIT SA CAVS NAGPADAYON
Nagpadayon ang kainit sa Cleveland Cavaliers ug ilang gipangbuntog ang host Atlanta Hawks, 121-114, aron irehistro ang ika-10 nilang sunodsunod nga kadaugan sa National Basketball Association (NBA) kagahapon.
Parehong ningmugna og double-double sila si Kevin Love ug LeBron James aron pangulohan ang kadaugan. Si Love nimugna og 24 puntos ug 12 rebounds samtang nitunol og 25 puntos ug 16 rebounds si James. Kini maoy ika-14 nga
double-double ni James sulod sa 22 ka mga duwa.
Ang Cavaliers, nga nakadawat sab og 19 puntos gikan kang Dwyane Wade, mingsaka sa 15-7 nga rekord samtang ang Hawks natagak sa 4-17 nga baraha.
Ang Hawks gipangulohan ni Dennis Schroder pinaagi sa iyang 27 puntos samtang nidugang og 22 puntos si Ersan Ilyasova.
Kontrolado sa Hawks ang kombati sa sayong bahin ug nakaposte sila og 67-58 nga labaw sa ulahing bahin sa 2nd quarter.
Hinuon wala motugot ang Cavaliers nga malubong og taga liog ug ilang gipahak ang labaw sa Hawks, 63-67, sa halftime.
Nabali ang dagan sa duwa dihang nagpauwan ang Cavaliers og 36 puntos sa 3rd quarter kumpara sa 23 puntos nga nadagit sa Hawks.
Pagsugod sa 4th quarter, ang Cavaliers nagtangag na og 99-90 nga labaw ug wala na sila motugot nga mabawi pa kini sa Hawks.
Sa Boston, nagpakatap og 36 puntos si Kyrie Irving aron agakon ang host Celtics ngadto sa 108-97 nga kadaugan batok sa Philadelphia 76ers.
Napahugtan sa Celtics ang ilang paggunit sa overall leadership bitbit ang 19-4 nga rekord samtang ang 76ers nasukamod sa 12-9 nga baraha.
Ikalima kini nga duwa ning maong season nga nakamugna si Irving og 30 puntos o pataas.
Nihatag og saktong suporta ni Irving sila si Al Horford ug Marcus Morris. Si Horford nitampo og 22 puntos samtang niamot og 17 puntos si Morris.
Ang 76ers gipangulohan ni Dario Saric pinaagi sa iyang 18 puntos, nihatag og 17 puntos si JJ Reddick samtang nidugang og 15 puntos si Ben Simmons.
Sa lain pang mga duwa, gipatapsingan sa Denver Nuggets ang Chicago Bulls, 111-110, gipangpukan sa Milwaukee Bucks ang Portland Trail Blazers, 103-91, samtang gipanglampornas sa Utah Jazz ang Los Angeles Clippers, 126-107.