DI AKO ANG KILLER: GERA

Nangatulog sila kauban sa iyang pamilya.

Mao kini ang gibutyag sa usa sa ,ga suspek sa pagpatay kang Ermita Brgy. Captain Felicisimo “Imok” Rupinta.

Si Jordan Gera, 39, dihang nahinabi sa tigbalita kagahapon nagkanayon nga inosente siya ug di wa siyay kalabutan sa kamatayon ni Rupinta.

Dugang ni Gera nga klarohon unta sa kapuyo ni Rupinta nga si Jocilyn Mendoza ang alegasyon niini batok kaniya.

“Iya kong gipasanginlan, wa gyud ko kahibawo aning panghitaboa.Kuyog ko sa akong pamilya nangatulog sa balay. Dako nalang ang akung kahibulong nga gipasanginlan nga usa ko sa nagpatay. Kaila mi ni, Kap, diha mi sa barangay nangwarta, wala koy ikasulti niya kay maayo siya nga tawo,” matod ni Gera.”

Niangkon siya nga napriso na na siya kaniadto dihang gipasanginlan usab siya niadtong 2004 nga nipatay og tawo.

Apan nakagawas ra siya dihang gi- withdraw ang kaso kay dili siya mao ang nagpatay niini.

Wa usab siya masuko nga gipahawanan sa barangay ang lugar diin siya naninda og mga lamas sanglit wa siya maapektohi kay naa ra gihapon sila sa iyang pwesto.

Niadtong pagbanhig patay kang Rupinta, naa ra siya sa ilang balay gihilot sa iyang anak nga nagpangidaron og 18 anyos ug kini ang makapamatuod nga inosente siya sa pasangil.

Duna siyay daghang saksi nga makapamatuod nga naa ra siya sa ilang balay uban sa iyang pamilya.

Giangkon ni Gera nga nag bingo siya uban ni Jimmy Largo usa ka adlaw human gipusil si Rupinta sukwahi sa pangangkon sa tulo ka mga saksi nga Huwebes sa alas 2 sa hapon hangtod sa alas 6 sa gabii.

Wa usab siya maninda sa mao nga adlaw kay naglain ang iyang lawas.

“Sa tinuod pagkaestorya kining akong kamot ug ang akong pagka tawo wala ko kasala sa usa ka tawo sa tibuok nakong kinabuhi. Wala ko kasuway og patay og tawo,” dugang ni Gera.

Apan ang Police Regional Office 7 (PRO) hugot nga nibarog nga si Gera lakip sa nipatay kang kapitan Rupinta ug pulos lang alibi ang depensa niini.

Matod ni Sr. Supt. Jonathan Cabal nga dunay positibong pag ila kang Gera nga naa siya sa crime scene sa dihang gihimo ang pagpamanhig sa kapitan.

“An eye witness account kung saan sya yung nasa crime scene eh. Wala naman kami sa crime scene eh mismong asawa ni Imok so sya talaga ang makakapag sabi,” matod ni Cabal.

Karong Lunes isang-at na sa PRO 7 ang kaso batok ni Gera ug gitinguha usab nila nga masikop ang laing duha nga pulos mga sakop sa gun for hire nga naglihok sa Sugbo.