TINDA, PARK SA OSMEÑA BLVD. IDILI NA
SA PAGPATUMAN SA DISCIPLINE ZONE SUGOD UGMA SA SIYUDAD, KAPULISAN
Sugod ugmang adlawa Lunes, hingpit na nga ipatuman sa kagamhanan sa dakbayan sa Sugbo ug kapulisan ang discipline zone sa Osmeña Boulevard.
Kini nagpasabot nga hawanan na ang sidewalk aron mahatagan og agianan ang katawhan nga moagi sa sidewalk, di sa dalan.
Kagahapon, usa si Konsehal Dave Tumulak, chairman on public order and safety, sa ninglakaw uban sa kapulisan aron pagsusi sa unsa’y posible nga mahitabo sa pagpatuman na niini ugma.
Matod ni Tumulak nga gitanaw nila ang mga nagbabag sa
sidewalk hilabi na kining unregulated nga mga manindahay. Dugang niya nga gusto nila nga mahibalik ang silbi sa sidewalk ug mao kini nga malakwan sa katawhan nga way nagbabag.
Ang pangu sa Prevention, Restoration, Order, Beautification, and Enhancement (PROBE) Raquel Bohol-Arce nagkanayon nga tungod kay adunay dapit sa syudad nga daghang gi-regulate nga mga manindahay, kinahanglan sila ibalhin aron di maundang ilang panginabuhian.
Dugang Arce nga nihangyo sila ug nauyunan sa miaging adlaw nga ilang discipline zone lang una phase by phase diin ang phase 1 gikan sa Capitol paingon sa R. Landon, kanang eskina duol sa Camp Sergio Osmeña sa Police Regional Office (PRO) 7.
Si Tumulak nagkanayon nga ang PROBE mao ang moguba sa nag-ali nga mga structure sa sidewalk, ang CCTO mao ang mo-clamp kon ilegal nga nagpark sa sidewalk.
Samtang ang Division for the Welfare of the Urban Poor (DWUP) mao ang mangita og kabalhinan sa maapektohan nga vendors.
Samtang nipahimangno usab si Police Station 2 Chief Insp. Maria Theresa Macatangay sa mga manindahay nga motuman sa maong mando.
“Awhag namo sa ilaha especially kadtong mga vendors nga unregulated ug vendors nga nasayod about ani is just to comply, on what has been ordered them to do, by the city hall and the authorities.”