Higpitan ang regulasyon sa paghimo og pabuto sa Lapu
Human sa aksidenteng pagbuto sa baligyang mga pabuto sa Barangay Babag, dakbayan sa Lapu-Lapu diin unom ka tawo ang angol, ang mga namaligyaay og pabuto gitigom sa awtoridad.
Ang mga dealer ug tighimo sa mga pabuto ug fireworks sa dakbayan gimanduan nga mobaligya lang sa mga produkto nga gitrugutan sa otoridad.
Mismong ang barangay, Lapu-Lapu City Police Office, Philippine National Police’s Firearms and Explosives Office, ug Bureau of Fire Protection ang nakighimamat sa mga tighimo ug dealers sa paboto aron pahinumduman kini kalabot sa kaluwasan ug balaod kalabot sa maong mga produkto.
Atol sa panagtagbo, giingnan ni Kapitan Epifania Augusto ang mga dealer ug tighimo nga bag-ong balaod ang ipatuman base sa mando ni Mayor Paz Radaza.
May bag-ong listahan sab nga gihatag ang kagamhanan sa dakbayan sa mga klase sa pabutong mahimong ibaligya.
Kini gilangkuban sa baby rocket, bawang, el diablo, judas belt, paper caps, pulling of strings, kwitis, mga gagmayng triangle o bisan unsa nga susama ang gikusgon.
Ang mga gitugutan sab sa awtoridad nga mabaligya nga pyrotechnic devices mao ang mga mosunod: butterfly, fountains, jumbo regular, luces, mabuhay, roman candle, sparkles, trompillo, patingog ug uban mga pailaw.
Si Sinsp. Felix Cleopas III, hepe sa Station 3 nagkanayon nga di mahimong makapamaligya ang mga tindera kon di hingpit makakuha og mga permiso ug clearance sa barangay, pulis, ug city hall.
Dugang niini, ang mga paboto o pyrotechnics nga ipamaligya nga wa nalakip sa listahan imbarguhon sa ilang buhatan.