Pamilyang Ouano wa gikonsulta sa kausaban sa fluvial?

Walay supak ang pamilyang Ouano sa dakong kausaban nga nadesisyunan sa kaparian sa Basilica Minore Del Sto. Niño labot sa pagpalapad sa rota sa Traslacion sa kasaulogan sa Sinulog sugod sa sunod tuig.

Apan si Atty. Rex Fernandez, legal counsel ug tigpamaba sa pamilya Ouano, niingon nga wa gikonsulta sa kaparian ang iyang kliyente sa usa nihimo sa dakong kausaban.

Nanghimakak ang kaparian niini nga Augustinian.

Nasuta ning mantalaan nga sa bag-ong kausaban sa Traslacion

sunod tuig, modalikyat na ang rota paingon sa dakbayan sa Lapu- Lapu ug didto na kini manukad alang sa fluvial procession pagkaugma sukwahi sa naandan niadto nga magsugod sa Ouano Wharf ang fluvial procession.

Matod ni Atty. Fernandez nga nakalitan ang pamilya Ouano sa kalit nga kausaban ug nganong wala sila gikonsulta niini sanglit naandan naman sa pamilya Ouano nga motampo isip ilang naandan ug debosyon sa Balaang Bata sud sa 37 na ka tuig.

Paambit niya nga nihimo ang sila og pakisusi kalabot sa maong kausaban og ilang nasuta base sa ilang imbestigasyon nga nalakip sa wa gikonsulta mao ang mga simbahan sa St. Joseph, kagamhanan sa dakbayan sa Mandaue ug Archdiocese of Cebu.

“Para nila (Ouano Family) way modo, kaning way batasan nga modiretso lang og himu’g desisyon nga way konsultasyon,” matod ni Atty. Fernandez.

Gitataw ni Atty. Fernandez nga niadtong Septiyembre nakadawat og suwat ang pamilya Ouano gikan sa mga kaparian nga di na sa Ouano wharf manukad ang fluvial parade ug di na sab gamiton niini ang barko nga kanunay sakyan sa Sto. Niño. Matod pa nga base sa official statement sa kaparian nga buot palapdan niini ang rota aron mas daghan ang makasalmot apan gikwestiyon kini sa sa iyang kliyente nganong karon lang kini gihimo human sa katuigan.

“Historical reason” maoy

laing gitumbok nga rason sa mga kaparian apan nakapangutana ang pamilya Ouano kon nganung karon pa man?

“There should have been a process nga maayo. Even the Archbishop said there should have been “proper promulgation” of the decision,” matod ni Fernandez. Bisan pa man sa mga kausaban, giklaro sa ni Atty. Fernandez nga ipadayon gihapon sa pamilya Ouano ang pag-abli sa balay niini sa kapistahan sa Sto. Niño ug mosalmot sab kini sa fluvial procession.

Si Atty. Fernandez nagkanayon nga 37 ka tuig ang nilabay, si Ernesto Ouano Sr. lang ang nidawat sa hagit ug nidupa sa pagpasakay sa Sto. Niño atol sa prosisyon niini sa kadagatan ug way laing pamilya ang nidawat sa hagit.

Apan matod sa Order of Augustinian Recollects nga ilang gipahibawo ang pamilyang Ouano sa kausaban.

Sa usa ka phone interview sa Sun-Star Cebu, si Fr. Ric Anthony Reyes, pangulo sa Secretariat Committee and Secretary, Fiesta Senor 2018, siya niingon nga nipadala sila og suwat niadtong Hunyo 2017 aron pagpahibawo sa mga Ouano sa ilang mga plano sa Traslacion.

Si Reyes niingon nga nipatawag sila og meeting sa executive committee aron hisgutan ang plano.

“Gi- invite namo ang mga Ouanos to sit with us and talked about the plan. We were expecting that ang mo- present nila kay one of the family because of course mas maayo man jud unta nga ang pamilya ang makasulti and makabungat sila sa ilang gustong ipaabot namo about sa ilang feelings and reaction,” nagkanayon si Reyes. “Wala man silay laing reactions aside sa hangyo ug sa pangutana nga gikan sa ilaha (representatives of Ouanos). So we understand nga okay sila...” dugang ni Reyes.