The love of my life

Wa gyud ko makasabot sa akong gibati niadtong tungora. Grabe gyud ka kusog ang pagbutuk-butok sa akong dughan. Mitan-aw ko kang Mama. “M-Ma, kinsa man tong namatay? Nganong naa man siya dad-a sa ilang ba’ay ni Ronron?” Nagkurog ang akong tingog. Way tingog nga gigakos ko ni Mama. Ug nabatyagan ko na lang nga naghilak na siya.

“Unsay buot ipasabot ani, Ma?” Ning higayona, mitulo na gyud ang akong luha.

“W-Wa na si Ronron, Digna. Grabe na ang iyang kanser.”

“P-Patay na si Ronron, Ma? D-Di na tinuod, Ma!”

Hapit ko na lang itukmod si Mama nga hugot nga naggakos nako. Nagdagan kong mibiya sa among terrace. Nagdali kong nanaog ug kusog kong midagan paingon sa balay nila ni Ronron. Nagsigeg tulo ang akong mga luha sa akong mga mata nga gipasagdan ko lang. Napahimutang na ang lungon sa dakong sala sa balay nila ni Ronron. Giablihan na ang gamay nga bentana dapit sa nawong ni Ronron.

“Ronron!” Misinggit ug mihilak ko pag-ayo nga migakos sa lungon ni Ronron. “Nganong gibiyaan man ko nimo!”

Kusog kaayong nauyog ang akong mga abaga tungod sa akong pagbakho. Midanguyngoy gyud ko samtang nagpadayon paggakos sa lungon nga nahimutangan sa lalaki nga gihigugma gyud nako. Unya, nakabatyag ko nga dunay naghapuhap sa akong buku-buko, hapuhap sa pagpangga. Mitindog kog tarong. Naghilak gihapon si Mama nga nagtindog tupad nako.

Niadtong tungora, sa sitwasyon nga naa ko sa grabeng kaguol, si Mama ra ang kapahungawan ko ani. Hugot kong migakos kang Mama. Nagsige kog bakho sa iyang dughan. Nagsige sab og hapuhap si Mama sa akong buku-buko.

“Ayaw pada’a aning nahitabo ni Ronron, Digna. It’s God’s will. Way makasupak sa kagustohan sa Diyos.”

“Sakit, Ma. Sakit gyud kaayo.”

Ning higayona, mibuwag na kog gakos kang Mama. Unya, dunay nagtunol og panyo nako. Pagtan-aw nako, si Rommel diay nga wa ka mamatikdi nga miduol nako. Gidawat ko ang panyo. “S-Salamat, Rom.” Naghingus-hingos kong namahid sa akong mga luha. Unya mitan-aw kog usab kang Ronron. Mora lang siyag natulog. Miginhawa kog lawom. Mitulo na sab ang akong mga luha. Pagkasakit gyud sa nahitabo sa among gugma ni Ronron. TAPUSON SUNOD GULA