Maghuwat ra ang kamatayon
Milanog ang katawa ni Antonino ug natakdan si Elpidio. Apan alang kang Elpidio usa ka mapasigarbuhong tawo kini si Antonino. Dugay na silang nagkuyog-kuyog, nagsugod sa gitas-on sa lahutay sa usa ka arte ug kini mao ang arte sa panulat. Diha sa ilang kalag anaa ang gugma ning maong matang sa arte; baniog na kaayo ang ilang mga pangalan. Silang duha matawag nga modelo sa mga batan-on nga misunod sa ilang kauwagon sa panulat. Naangkon na nila ang bulawan nga dili mabaligya ug ang kasilaw o kasuwaw niini halos ludhan na sa mga batan-on.. Way makapukan kanila kon bangga na sa panulat ang hisgutan. Silang duha kanunay maglayag sa kadaugan, ilabi na sa unang ganti sa sugilanon, balak, gumalaysay, nobela, drama ug uban pang matang sa literary contest. Gani, ila na mang napupo ang titulo nga Hall of Famer ning matanga sa arte. Gihimo silang idolo sa bag-ong mingbuswak nga mga batan-ong magbabalak ug magsusugilanon.
Apan damgo ni Antonino nga makab-ot niya ang Nobel Prize for Literature.
Mikatawa si Elpidio. “Huhuhuhahahahahaha! Bwaha-haha-hahahahahaha! Dili na kana maabot nimo, Pre!”
“Unsay dili?!” mibanghag si Antonino.”Ngilngig ko. Bantugan ko! Versatile, haaaaaa!” Ug mikatawa si Antonino nga daw nagbiaybiay sa iyang higala. “Maangkon ko ang Nobel Prize!”
“Di lagi na mahitabo, Pre. Pinoy lang ta. Wala gani makahimo sila si Jose Garcia Villa, Nick Joaquin, Greg Brillantes, F. Sionil Jose ug Renato Madrid, ikaw pa kaha? Nia ka lang sa atong rehiyon mopatugbaw sa imong abilidad sa panuwat. Dili yawe ang pagdaog sa Palanca, Philippine Free Press, ug Philippine Graphic, kay nakadaog na man ka niini, ug uban pang pasidungog sa literatura sa Pilipinas dinhi. Ug bisan gani sa nadaog mong ganti sa Sun,Star/ Dona Modesto Singson Gaisano Literary Award dili pa ikahanig nga maoy basihan pagkab-ot sa Nobel Prize. Hmmmm!” miigham si Elpidio. Nahilom si Antonino ug wala na motingog, ingon sa naghinuktok. “Pride is just a foolish mask,” miigham pag-usab si Elpidio. “Aw, kon mao na, Bay, maypag magpakamatay ko, kay tiguwang na man sab ko,” hinay ang tingog ni Antonino. “Aw, kana nuon, mao nay klarong makab-ot nimo. Kay way makapugong sa kamatayon,” hinay sab ang tingog ni Elpidio nga maguwang lang sa hagawhaw. Mitutok si Antonino kang Elpidio sa tinutokan nga dunay daghang sambog sa kahulogan, apan wala ikapadayag. Ug nahitabo ang wala damhang hitabo. Nianang pagka sunod semana gidungog nga namatay ang Hari sa Panuwat. Daghang batan-ong mga magsusulat ug magbabalak ang nahinugon niya sa iyang kamatayon. Si Kerwin nga misugod na pagbuswak pagka magbabalak namulong sa hilom, “Legend is forever. Legend is immortal, but no matter how great we are, death is waiting for all of us!” (KATAPUSAN)