Giluwas sa tindahan
Ako si Alma Carias, 44 anyos ang panuigon, taga Katipunan, Alicia, Bohol.
Usa ako ka biyuda ug may duha ka mga anak. Ang kamaguwangan kanila gradwado sa kolehiyo sa kursong Nautical samtang ang usa fourth year college na sa kursong mechanical engineering.
Tuig 2011 dihang nagsugod ko og ginagmay nga tinda-tinda sa puhonan nga P3,000. Apan dili kadto maoy among gisaligan kay ang akong bana aduna may trabaho nga mao gyud ang among gikuhaan sa among panginahanglanon ug sa gasto sa among mga anak sa ilang pagtungha.
Apan kalit nahugno ang tanan dihang nitaliwan ang akong bana tungod sa kanser. Bisan pa man sa nahita- bo, naniguro ko nga mabuhi nako akong mga anak pinaagi sa pagnegosyo gamit ang gamay nga puhonan. September 2014 dihang nisulod sa among dapit ang micro-finance nga programa sa Ramon Aboitiz Foundation Inc. sa among lugar ug giaghat ako sa among silingan nga moapil.
Kulang ang akong puhonan naaghat gyud ako sa pag-apil aron makahulam og kapital.
Kaluoy sa Ginoo wala man sab magmingaw ang akong negosyo. Dako gyud ang natabang sa akong pagnegosyo sa pagpaeskwela sa akong mga anak ug sa among pang-adlaw-adlaw nga konsumo. Ako lang gyung kanunay gituman ang tambag nga ang gihulaman nga kwarta gamiton lang gyod sa saktong pamaagi dunganan sa pagkugi.
Sa akong pagnegosyo daghan ang mga kalisdanan ang akong naagian, ilabi na kay daghan ang kompetensiya ug daghan ang mangutang nga dili na mobalik ug adto na mamalit sa laing tindahan. Ako lang giisip silang tanan nga mga pagsuway ug gihangad ngadto sa Kahitas-an.
Kay naleksiyon, ang akong gibuhat karon mao nga kutob sa mahimo akong gikontrolar ang mangutang ug gipasabot ang mga suki nga adunay limitasyon sa kantidad sa tinda nga pwedeng mautang.
Karon, anaa na ako sa ika10 nga cycle sa pag-loan diin P50,000 ang akong nahulaman nga akong gidugang og pundar sa akong tindahan. Namaligya na sab ako og load gawas sa akong general merchandise nga tindahan.