LUHA SA KALAMPUSAN
Giisip ni Erwin Macua nga sayo nga pinaskohan gikan sa kahitas-an ang iyang pagkapasar sa Licensure Examination for Teachers (LET) bag-ohay lang.
Siya ang security guard sa St. Theresa’s College, dakbayan sa Sugbo, nga gidungan ang pagtrabaho ug pag-eskwela hangtod nakahuman niadtong Marso ning tuiga sa kursong Bachelor of Elementary Education major in general education. Ang iyang sugilanon na- feature na sa Superbalita Cebu sa Super Bilib nga nigawas niadtong Marso 28, 2017.
Niadtong Lunes, laing maayong balita ang iyang nadawat samtang nagbantay sa gate sa STC.
Usa ka maestra ang nanawag niya sa intercom ug nipahibawo sa iyang pagkapasar sa LET.
“Nakahilak gyud ko sa kalipay. Wa ko kasabot sa akong gibati. Nagpasalamat ko sa Ginuo nga nakab-ot nako ang hingpit nako nga damgo nga mahimong usa ka licensed ug
professional teacher,” asoy sa 39-anyos nga amahan sa tulo ka magsuon.
Sud sa usa ka buwan, way igong pahuway ug katulog si Erwin Macua matag adlaw sugod niadtong hinapos sa Abril hangtod sa hinapos sa Mayo kay nagsunod ang iyang review sa board exam ug trabaho.
Sa adlawan, si Macua moapil sa review center sa STC gikan alas 8 sa buntag hangtod alas 5 sa hapon, dayon molahos siya og duty sa eskwelahan sa alas 7 sa gabii hangtod sa alas 7 sa buntag.
Sa matag Sabado gikan sa Hunyo hangtod sa Septiyembre, nag- review usab siya sa Carl Balita Review Center sa dakbayan sa Mandaue nga way bayad.
Bisan kon 22 pa lang ka adlaw sa dili pa ang Pasko, apan alang kang Macua pinaskohan na gikan sa kahitas-an ang laing kalamposan nga iyang natagamtaman.
“Sayo nga pinaskohan gyud ni siya. Mao ni akong gipangayo sa Ginuo,” dugang niini.
Pipila ka mga ginikanan sa STC ang nipahalipay niya, may nihatag og kwarta, cake, pagkaon samtang ang uban apil ang mga magtutudlo ni- congratulate usab.
Ang kwarta iyang gipalit og lechon manok ug gisaw-an sa ilang pamilya ug mga silingan.
Kabahin sa iyang pagpangandam sa board exam ang pag-andam usab sa iyang kaugalingon sa espirituhanon nga aspeto.
Siya mapasalamaton sa Ginuo, mga madre ug ginikanan sa STC, iyang mga kauban nga gwardya nga nihatag niya og oras aron siya makaeskwela ug maka-review, pamilya ug sa tanang mga tawo nga kabahin sa iyang kalamposan.
“Akong tambag sa kabataan nga mag- focus sa ilang pag-eskwela, paninguhaon makab-ot ang ilang damgo ug dili sagulan og bisyo. Dili babag ang kalisod, ang edad basta naay kugi, determinasyon ug paningkamot aron molampos,” mensahe ni Macua sa kabataan.