TABAL MODEPENSA
Mosuway pagkulit og kasaysayan si Cebuana Olympian Mary Joy Tabal sa iyang pagsuway og depensa sa women’s 42K title sa 41st Milo Marathon National Finals karong adlawa.
Ang lumba manukad sa atubangan sa Cebu Norman University (CNU) unya ang rota niini mosangko sa Cebu City Sports Complex.
Sa interbyu sa Sun.Star Cebu, igsuong buhatan ning mantalaan, nagkanayon si Tabal nga dako og tipik sa iyang dughan kining maong lumba gumikan kay dinhi nagsugod pagkahulma ang iyang mga damgo.
Kini maoy labing unang higayon nga mosuway paglabni ang lumad nga taga Brgy. Guba, Cebu City sa titulo atubangan sa iyang mga katagilungsod.
Kaduha nakuha ni Tabal ang titulo sa Manila unya tagsa sa Pampanga ug Iloilo City.
Kon modaog pagbalik si Tabal, hayan makatupong siya sa naabot ni Arsenia Sagaray, kinsa mao pa’y bugtong nakaangkon sa national title sulod sa lima ka mga higayon.
Kon buot hunahunaon, mas bug-at ang dungog ni Tabal kon mokampiyon gihapon siya gumikan kay siya maoy makabaton sa titulo sulod sa lima ka sagunson nga katuigan. Human siya nakalangkat og
gold medal sa Southeast Asian Games niadtong Agusto, wala’y hunong sa pag-ensayo si Tabal ug padayon kining nag- training alang sa iyang tinguha nga makadagan pagbalik sa Olympics ug mahimong usa sa labing kusog nga marathoner sa tibuok Asya. Ang iyang pagdagan sa Milo National Finals tipik sa iyang preparasyon alang sa iyang tinguha.
Ang sakop sa Motor Ace Racing Team hugot nga nag- training sa Italy ug mibalik kini sa Sugbo ning bag-uhay lang aron modepensa sa iyang titulo sa Milo Marathon national finals.