UV, USJ-R magparang sa CBAA finals karon

Mga duwa karon

1:30 pm- CIT batok CCC/UC

(46A)-3rd place 3:00 pm- USC batok UC

(45U)-3rd place 4:30 pm- UV batok USJR

(46A)-championship 6:00 pm- UV batok USJR

(45U)-championship

Human sa pipila ka katuigan, mag-abot na usab ang power-house University of the Visayas (UV) Green Lancers ug University of San Jose Recoletos (USJ-R) Jaguars sa

finals, ug ning higayon, sa CAAA Basketball Alumni Association (CBAA) Flashback

tournament nga motapos karong gabii sa Talisay City Sports Complex.

Kini human sila maoy mipatigbabaw sa ilang tagsa-tagsa ka mga kategoriya sa elimination round.

Niadtong Dominggo, ang Jaguars napukan sa Cebu Institute of Technology (CIT), 100-92, sa no-bearing game sanglit nakasiguro na man og luna sa finals ang USJ-R.

Hinuon ang CIT nakabaton og katungod nga makigsangka sa CCC alang sa 3rd place.

Samtang nasilyo usab sa UV ang ikaduhang lingkuranan sa finals pinaagi sa paglubong usab sa CCC/UC sa 46-above.

Sa 45-below, gipukan sa USJ-R ang CTS, 117-92, ug gipatapsingan usab sa University of San Carlos (USC) Warriors ang Southwestern University, 84-76.

Nakalingkawas usab ang UV Lancers sa pagpanghudlat sa Salazar Institute of Technology (SIT) Skyblazers, 123-112.

Kon kahinumdoman,katapusang nag-abot ang USJ-R ug UV sa wala pa mabungkag ang CAAA niadtong 1993.

Ang Jaguars gilangkuban pa nila ni Leodie Garcia, John Ferriols, Joel Co, Frankie Lastimoso, Roel Lawas, Bong Pineda, Rex Armojallas ug ubos ni coach Norberto “Titing” Manalili samtang nangulo usab sa UV sila si Lowell Briones, Tata Fernandez, Allan Cabradilla, Renato Alforque, Derrick Bughao, Ope Abellana, Richard Caliao ug Jomer Rubi.

Niadtong 1980-81 season, ang UV nga gipangulohan nila ni Woodrow Balani, Christopher Amomonpon ug Bulawin mibuntog usab sa Jaguars apan sa sunod tuig nakabawos na usab ang Jaguars nga gibituonan usab nila ni Pablo Yu, Manalili, Paul Abaiz, Rey Abarquez ubos ni

coach Baring. Ang CAAA nabungkag niadtong tuig 2000 human kini ilisi sa Cebu Schools Athletic Foundation, Inc. (Cesafi).

Tungod niini, ang CBAA nga gilangkuban sa mga kanhi CAAA players nahulma pinaagi sa pagpangulo nila ni Pablo Yu, Jun Montalbo, Celerino Cabanca Jr., Oslec Evangelista, Rey Abarquez ug uban pa.

Kini aron paghatag og kahigayonan nga magkahiusa og balik ug magkailhanay ang mga kanhi CAAA players.