CAVS NAKA-ONSE KA SUNODSUNOD

Nagpakatap og 34 puntos si LeBron James lakip na niini ang krusyal nga pito sa nahabiling 1:22 minutos aron agakon ang host Cleveland Cavaliers sa 116-111 nga kadaugan batok sa Memphis Grizzlies kagahapon sa NBA.

Ang Cavaliers ningposte sa ika-11 nilang sunodsunod nga kadaugan nga nagpasaka sa ilang rekod ngadto sa 16-7 nga baraha.

Balit-ad ang nahitabo sa Grizzlies gumikan kay naangkon nila ang ika-11 nilang sunodsunod nga kapildihan nga nagbahagba sa ilang rekord ngadto sa 5-17.

Ikatulo kining sunodsunod nga kapildihan sa Grizzlies gikan nila gitaktak si coach David Fizdale, kinsa gihulipan ni interim coach J.B. Bickerstaff.

Ang Grizzlies naggukod og 19 puntos, 72-91, sa ulahing bahin sa 3rd quarter.

Apan sa wala damha, ninggukod ang Grizzlies hangtod nga natabla nila ang duwa, 109-109, sa nahabiling 2:10 minutos.

Human niini, daw gipas-an ni James ang tanang responsibilidad sa opensa sa Cavaliers ug wala siya napakyas.

Nakakompleto si James og three-point play aron padistansyahon na sa ang Cavaliers ug minglahos na kini paingon sa kadaugan.

Sa 4th quarter, si James nimugna og 15 puntos.

"That’s what my teammates, when it’s winning time in the fourth quarter, they want me to step up and do what I do best,” matod ni James.

Gipasapot ni James nga bisan sa grabeng pagpanghudlat sa Grizzlies, wala sila nagpadala sa pressure ug nagtutok sila nga makabawi.

"But, very resilient on our behalf just to keep our composure and continue to execute late in the game,” asoy ni James.

Nidugang og 20 puntos si Kevin Love alang sa Cavaliers, nidugang og 17 puntos si JR Smith samtang niamot og 16 puntos si Dwyane Wade.

Ang Cavaliers nagkinahanglan na lang og usa ka daog aron matupngan ang ilang labing taas nga sagunson nga kadaugan gikan niadtong 2015.