DUL-AN 13 MIL KA BOTANTE NAPUNO
Mapun-an og dul-an 13,000 ka mga bontante ang dakbayan sa Sugbo kinsa gikatakda nga mosalmot sa barangay ug Sangguniang Kabataan eleksyon sa Mayo sunod tuig.
Sa record sa Commission on Elections (Comelec) sa north
district, ang buhatan ni Atty. Marchel Sarno nakarehistro og 5,287 ka bag-ong botante gikan niadtong Nobyembre 6 hangtod Nobyembre 30.
Apan mas daghan ang narehistro sa buhatan ni Atty. Edwin Cadungog sa Cebu City
south district sanglit niabot ang new registrants og 7,257 human sa 24 ka adlaw nga lugway sa rehistrasyon.
Ang 12,544 ka bag-ong botante mahingpit ang ilang pagsalmot sa bugnong lugaynon sa higayon nga maaprobahan na sila sa Election Registration Board (ERB).
Sama sa naandan, ang katapusang adlaw sa rehistrasyon (November 30) ang adunay labing daghan nga nagparehistro sa 24 ka adlaw nga gihatag sa Comelec.
Sa north district, sila nakarehistro og 911 ka mga bagong botante samtang 1,171 ang habig sa south district.
Ang labing gamay nga narehistro sa duha ka buhatan nahitabo niadtong Nobyembre 15 diin nitala lang ang buhatan ni Sarno og 129 ka botante samtang 171 ang narehistro niadtong Nobyembre 16 sa opisina ni Cadungog.
Ang Comelec wala nitugot nga adunay botante nga makabalhin sa ilang pagparehistro sanglit gitagana ang 24 ka adlaw sa bag-ong botante nga gustong mobotar sa piniliay.
Sa eleksyon niadtong tuig 2016, ang Cebu City adunay 630,003 ka mga botante diin 524,850 ka mga tawo ang niboto kon 83.30 porisyento ang nisalmot sa piniliay.