Suspek sa pagpatay ni Rupinta gipasakaan og kaso sa piskaliya

Human nasikop sa kapulisan niadtong Biyernes, gipaubos na sa inquest proceedings sa piskaliya ang laing suspek pagbanhig-patay kang Kapitan Felicisimo “Imok” Rupinta nga si Jordan Gera.

Sama sa unang nasikop nga si Jimmy Largo, nag-atubang na usab siya sa mga kasong murder ug attempted

murder subay sa kamatayon ni Rupinta ug sa suway nga pagpatay sa kapuyo niini nga si Jocelyn Mendoza.

Si Mendoza niila na usab kang Gera isip usa sa mga nipaulan ug bala sa ilang sakyanan sa Barangay Yati, Liloan, atol sa ilang panag-abot sa piskaliya.

Si Fiscal Liewellyn Bonghanoy sa Provincial Prosecutor’s Office maoy nipahigayon sa inquest proceedings.

Walay abogado si Gera atol sa inquest apan nidesisyon siya nga dili na moduso ug counter affidavit ug adto na sa korte motubag sa mga pasangil batok kaniya.

Walay piyansa nga girekomendar alang sa temporaryong kagawasan ni Gera tungod kay usa ka non- bailable offense ang murder. Lakip sa mga gigamit nga ebidensiya batok ni Gera mao ang motorsiklo nga giingong gigamit niini atol sa krimen.

Si Supt. Reynaldo Magdaluyo sa Regional Special Operations Group (RSOG) 7 nangayo lang una ug pagsabot nganong dili pa nila itug-an kon kinsa ang nagpaluyo sa pagpapatay kang Rupinta.

Matod niya, nakaila na sila niini ug nagpadayon sab ang ilang pag-gukod niadtong ubang suspek nga posibleng moabot pa ngadto sa 5 ka mga indibdiwal.