Balaudnon alang sa Angkas

Kadtong gipasalig ni Cebu City Mayor Tomas Osmeña sa mga drivers ug operators sa Angkas nga ang City Hall na maoy motugot ug mokontrolar kanila sa pagpamasahero nagdugang-dugang lang to sa problema. Kay sa pagkatinuod lang, way gahom nga kapasikaran ang mayor nga iyang malalis ug masupak kon unsay anaa sa nasudnong balaod.

Samtang atong gihangop ang kamatuoran nga gikinahanglan karong panahona ang Angkas o habal-habal tungod sa grabing kahuot sa trapiko, pero wa kini magpasabot nga dili na lang ta motuman kon unsay anaa sa balaod.

Giingon man gud niini, ang sakyanan nga dunay duha lang ka ligid, wala tugoti mga makapamasahero. Buot ipasabot nga dili mahimong sakyanan alang sa publiko ang motorsiklo.

Ug kon tugotan ni Osmeña nga maka-operate kining mga Angkas operators/drivers makagarantiya ba siya nga dili na kini dakupon sa Land Transportation Franchise and Regulatory Board (LTFRB) nga dako man kining illegal?

Hinuon dili pa hingpit nga sirado ang paglaom sa Angkas nga mahimong legal ang ilang pagpamasahero.

Niadtong Dominggo, mga sakop sa Angkas nipahigayon og unity ride sa pipila ka mga kadalanan sa Sugbo ug nagtapok sa Plaza Independencia human kini motambong og misa sa Basilica del Santo Nino.

Si Cebu City Congressman Raul del Mar mao nay miatubang kanila. Mas katuohan pa kining gipasalig ni Kongresista del Mar kay sa kang Osmeña.

Matod ni del Mar nga magbuhat siya og balaod nga magtugot sa motorsiklo nga makapamasahero. Sa ato pa, iyang amendahon ang unang balaod nga nagdili niini.

Ubos unya sa maong balaodnon ang LTFRB maoy hatagan og katungod nga mo- regulate niini. Mas kini pay posibli ug hapsay pa nga paagi kay sa kang Osmeña.