I don’t want to wait
Sus, kaayo gyung sumbagon, uy. Si Ramir malipayon kaayo nga nakig-estorya kang Jonna nga malipayon sab. Diha sa sulod sa tindahan si Jonna samtang si Ramir diha sa gawas, nag-inom og softdrinks. Dunay sari-sari store sila si Jonna ug siya ang mobantay kon wa mi klase. Sunday man ron. Silingan ra ming tulo sa Hipodromo. Aw, guwapa man sab nuon si Jonna samtang ako, matod pa sa mga estambay daginuton og hitsura.
Unsaon, gawas nga yagpis ko, kana bang morag kawayan nga nagtuyugsoy lang ang lawas, taas pa gyud kog suwang. Di gyud ikasuroy sa Colon, ingon sa mga burukinto ug hinawayon nga mga lalaki sa among lugar.
Mibalik na lang ko sa akong agi. Magpalit man unta kog sabon para laba, kay ako man ang maglaba sa amo kon way klase, wa na lang ko modayon. Didto na lang ko magpalit sa laing tindahan nga layu-layo sa among balay. Maayo man unta sa ilang Jonna kay duol ra.Samtang nagsige kog kusu-kuso sa akong gilabhan nga mga bulingon nilang Mama, Papa, sa bugtong kong igsuon nga manghod nako, ug sa akong mga bulingon mismo, nagsige kog yawyaw. Gikusog kog kusu-kuso ang biste nga akong gisabonan. Nag-imagine ko nga nawong ni Ramir ang akong gikusu-kuso. Naglagot gyud ko niya. Aw, labaw na kang Jonna.
“Naunsa ka diha, Jane? Nag- estorya mang mao rang usa?”
Giduol ko ni Mama. Nakadungog diay siya nako.
“Wa man, Ma. Nagkantalang ko. Nagpraktis ko kay moapil ko sa audition sa Tawag Ng Tanghalan!” Igo ko lang gipasiplatan si Mama. Gingisloan ko siya.
“Tawag Ng Tanghalan? Sus, may pag mag-barker kas dyip depasaheroan kay angayan ka pa. Kayabag anang imong tingog.” Nagkatawa si Mama nga mibiya nako.
Nagpangawot na lang ko sa akong ulo. Nagkasabon ang akong buhok. Nagsige gihapon kog bagutbot. Paita, giyaga-yagaan na lang ko ni Mama tungod sa akong hilom nga paghigugma kang Ramir. Porbida sab ning akong kasingkasng, uy! Nagpaturagas man lag pitik ngadto sa lalaki nga bisan pakapinan pa tingali kog awto, di gyud molingi nako?
Gawas nga guwapo ug macho si Ramir, anak sab siyag dato sa among lugar. Trato na tingali sila si Jonna. (SUMPAYAN)