Discipline zone ipatuman sa Lapu-Lapu

Ang mga barangay Pajo, Pusok ug Ibo sa dakbayan sa Lapu-Lapu maoy gihimong pilot barangays nga magsilbing ‘Discipline Zone’ diin paghugtan ang pagpatuman sa national law ug local nga ordinansa alang sa malinawong dapit.

Si Mayor Paz Radaza nagkanayon nga sa mga dapit nga gideklarar nga ‘Discipline Zone’ tutokan niini ang pagpatuman sa curfew, lagda sa trapiko, towing niadtong magpataka og parking, di magpataka og labaw sa basura lakip na sa pagpangolekta niini ug uban pa.

Sa maong paagi maanam og disiplina ang mga lumolopyo o konstituente nga motuman sa mga balaodnon.

Apan ang ubang barangay nga wa hinganli wa nagpasabot nga di motuman sa lagda sanglit buot sa mayor nga ang tibuok dakbayan mamahimong ‘discipline zone’.

“To the rest of the barangays they should identify a sityo nga mopatuman sab ini (discipline zone),” dason ni Radaza.

Gihangop sa opisyal ang maong programa aron nga makab-ot ang kahusay ug kalinaw dili lang sa usa ka particular nga lugar apan lukop dakbayan.

Sa susamang kalambuan, dakong uyon ang mayor nga ibalik na sa kapulisan ang kampaniya batok sa ilegal nga drugas.

“Ako gyud gi- push ang drug clearing operation kay were on the process sa pagila sa pito ka mga barangay sa Olango (island) nga ‘drug free barangay’,” panapos sa opisyal.