Isla Amazona

Kapitan si Amorado sa usa ka inter-island ship nga magbiyahian sa Manila, Cebu, Cagayan de Oro ug Davao, balik-balik. Kuwarinta na ang iyang edad ug may maanyag nga asawa, si Bella. May duha sila ka anak nga mga tin-edyer na. Sila Mario ug Ella. Guwapo si Amorado ug husto sa pamarog ug katahaan nga tawo. Bisan gimahal niya ang iyang asawa, dili niya mapugngan ang iyang pagka maibugon sa mga guwapa ug seksi nga mga babaye nga iyang ikahibalag. Dukirok siya sa mga babaye. Siya ang Chief Mate sa M/V Paraiso. Tungod sa iyang gahom may mga babaye nga mohangyo nga mosakay nga libre kay wa silay ikaplete. Adto niya tagoi sa iyang kabin diin ang bugti usa ka gabii nga kalipay. Sa panahon nga molandig sa pantalan sa usa ka siyudad ang iyang barko, adto siya sa beer house magpalabay sa kalaay uban sa usa ka matahom nga GRO nga dadon niya sa motel. Gimatuod niya ang pagya nga ‘The sailor has a woman in every port.’

Apan dili gyud matag-an ang dagan sa panahon. Usa ka gabii samtang naglawig ang M/V Paraiso sa dagat mikalit lang pagbundak ang kusog kaayong ulan. May unos sa lawod sa Siquijor nga kalit mihampak sa barko. Maayo ang panahon sa ilang paggikan sa Cebu paingon sa Cagayan de Oro. Pero ang kinaiyahan may lihok sab nga dili matugkad sa kaalam sa tawo.

Kalit milipak. Kusog ang dalugdog nga gidunganan sa liti ug kilat. Mikiling ang barko paingon sa wala dihang gihampak sa mga dagkong balod ang tuo nga parte sa barko. Ang M/V Paraiso mikiling sa wala. “Abandon ship! Abandon ship!” mando ni Amorado. Siya ang katapusang miambak. Milangoy siya nga walay tumong. Unya kalit nawad-an siya sa panimuot.

PAGBUKA sa mga mata ni Amorado nabatyagan niya nga gialirongan siya sa pipila ka mga babaye nga mikagiki ug mingisi kaniya. “Hihihi! Hihihi! Hihihi!” Nabati niya ang tagming nilang kagiki. Iyang nakita nga puros sila guwapa ug seksi sa gisul-ob nilang bikini nga nagkalainlain ang kolor.

“Maayong pag-abot sa Isla Amazona, Senyor!” matod sa usa ka matahom nga dalaga nga mipungko sa iyang kiliran ug gipabangon siya. “Bien venida!” matod sa ubang mga dalaga.

‘Yati, sagol Kinatsila ang ilang pinulongan,’ ni Amorado sa hilom.

Gidala siya sa mga babaye ngadto sa usa ka panting ug gipaatubang sa usa ka medyo edaran na apan matahom nga babaye nga naglingkod sa trono. Puti ang pamanit sa rayna ug taliwtiw ang ilong. Usa siya ka mestisa Katsila.

“Mahal nga Rayna Bellisima, amo siyang nakit-an sa aplaya. El es capitan de un bapor nga nalunod sa dagat sa Siquijor,” matod sa dalaga nga nipatindog kang Amorado kaganiha.

Miyukbo si Amorado atubangan sa rayna, “Buenos dias, mahal nga Rayna!”

“Quien es tu? Kinsa ka? Como se llama?” sa rayna nga mitutok kang Amorado.

“Me llamo Amorado Cruz para servirle!” ni Amorado nga migamit na sa pipila ka mga pulong Kinatsila nga iyang nakat-onan sa didto pa siya magtrabaho sa Espanya isip marinero.

Mimando ang rayna nga dad-on si Amorado sa balay ni Valentin nga usa ka mananabang. Didto nahibaw-an niya gikan sa tigulang nga gidagsa siya sa Isla Amazona nga ang nanagpuyo mga babaye. Way makitang lalake dinhi, kay kon lalake ang ihimugso sa inahan ipaanod nila kini sa dagat. Ang mga batang babaye lamang ang ilang buhion. “Kita lang ang mga lalake dinhi karon. Ikaw buhion ka nila aron mopasanay sa ilang kaliwat. Dili na ko makahimo sa buot nilang ipabuhat nako, pero gibuhi ko nila kay usa ako ka mananabang,” matod ni Valentin. “Ug dili ka makaikyas dinhi kay may misteryo kining islaha. Ang mga balod mopabalik nimo nganhi kon mosuway ka paglayas!”

Nianang pagka gabii sa mando sa Rayna didto si Amorado matulog sa lawak sa Rayna. Natagbaw ang iyang kahigal sa mga babaye. Sa misunod nga daghang mga gabii, lainlaing mga babaye ang iyang gikadulog sa kama, hangtod nga nagniwang siya ug nasakit. Dihang nagpinal na siya, nahinumdom siya sa iyang asawa ug mga anak. Dili na niya sila igkita kay ang Isla Amazona mao na may iyang lubnganan. Mitulo ang iyang mga luha.

(KATAPUSAN)