Way drugs sa Greyhound operation sa Cebu City Jail

Gipaubos sa greyhound operation ang Cebu City Jail sa Philippine Drug Enforcement Agency 7 inabagan sa Cebu City Police Office ug Bureau of Jail Management and Penology gahapon sa buntag.

Apan way nakuhang illegal nga drugas ang mga operatiba gawas sa mga drug paraphernalia ug 10 ka cellular phones nga gipanag iya sa mga binilanggo.

Matod ni Jail Supt. Renante Rubio, jail warden sa Cebu City Jail nga una kining major greyhound operation sukad siya milingkod isip Jail warden sa maong bilangoan usa ka buwan na ang nakalabay.

Wa na masurpresa si Rubio nga wa silay makuha nga illegal nga drugas sulod sa selda sa mga binilango nga nalambigit sa illegal nga drugas sanglit matag adlaw ilang gihimo ang surprise inspection.

Kini nagpasabot nga way drugas nga gipayuhot agi sa jail padulong sa gawas kay gikunsumo na lang, samot nga kini mahal na kaayo.

Iyang giangkon nga ang mga dalaw ra usab ang mosuway og payuhot sa sulod sa bilangoan diin ang mga suspek mogamit og bata aron way tulobagon kon masakpan sa jail officers.

Niadtong miaging adlaw usa ka bata ang ilang nasakpan nga suway unta nga mopasulod sa pinakete sa illegal nga drugas.

“Gahapon nakadakop tag bata gibutang ang shabu sa 100 peso bill iyang gikumkom karon pagkadakop niya ang buhaton sa mga ginikanan dili mosulod paunahon ang anak madakpan na gani modagan ang inahan,” matod ni Rubio.

Tungod sa kahugot sa pagbantay sa entrance, lisod na usab ang mga kontrabando sa pagsulod nga usa sa hinungdan nga way nakuha nga drugas.