Di ang pagdakop

Human gideklarar ni Presidente Rodrigo Duterte nga mga terorista ang Communist Party of the Philippines (CCP) ug New People’s Army (NPA), siya nihulga nga hayan apilon pagsikop ang legal nga mga organisasyon nga nagsuporta kanila. Matod ni Duterte nga iyang ilakip pagpadakop ang mga tawo nga nagsuporta sa mga komunista. “Huwag na tayo magbolahan,” matod sa Presidente.

Sa ilang mga operasyon, ang legal fronts sa CPP mao ang sagad magmartsa, nagdala sa propaganda sa partido nga di mahimo sa ilang armadong grupo.

Bisan pag nagsuporta kini sila, apan duna silay katungod sa pagpadayag sa ilang baruganan ubos sa demokrasya ug ang pagkakomunista di na kalapasan sa balaud sa dihang giwagtang sa panahon ni kanhi presidente Fidel Ramos ang anti subversion law niadtong 1992.

Tumong sa pagwagtang niini mao ang paghatag og dan alang sa malinawong pagkab-ot og kalinaw tali sa walhong mga pundok ug pagtubag sa ilang mga yangungu.

Inhustisya ug kakabus ang kadaghanang rason sa pagtipon sa yanong mga tawo sa mga walhon. Pipila lang kanila ang nakasabot sa komunismo.

Dunay uban nga nakakita sa kakuwangan sa kagamhanan sa pagtubag sa mga panginahanglan sa mga uyamot sa katilingban hinungdan nga bisan ang mga edukado, naaghat sa pag-apil.

Ang pagmartsa sa kadalanan aron magsaba-saba sa pagpatugbaw sa mga isyu nga balido ug makaaghat usab sa kagamhanan sa paghimog lakang.

Ang pagpaningkamot nga maabot sa serbisyo ug pagpangalagad nga tiunay sa mga kabus sa lagyong mga dapit dako kaayo og ikatabang pagpakunhod sa insurhensya.

Kini mao ang epektibong mga sulusyon, di ang pagdakop sa ilang legal fronts.