Sanofi, WHO ug DOH ang mabasol
Morag miulbo akong kaspa sa dihang gibutyag ni kanhi Department of Health (DOH) secretary Janette Garin nga miangkat ang nasod sa Dengvaxia, usa ka anti-dengue vaccine, gumikan kay na-pressure sila sa mga kongresista ug mga senador. Napalit ang vaccine niadtong hinapos sa Aquino administration sa kantidad nga P3.5 billion nga matod pa mao unta ang ibilin nga ligasiya ni Presidente Noynoy Aquino ngadto sa kabataan aron dili makasinati niining makalilisang nga sakit nga dengue. Ligasiya sa iyang kagaral, naunsa na ni karon?
Matod ni Garin nga walay kasaypanan ang pagpatuman sa DOH sa dengue vaccination program kay nasubay ang tanang rekomendasyon ug guidelines sa World Health Organization (WHO). Mitumaw lang ang kontrobersiya sa dihang mismo ang manufacturer ning maong vaccine, Sanofi Pasteur, miangkon nga aduna kini di maayong epekto kon mahatag ngadto sa pasyente nga wala pa makaagi og dengue. Target sa programa mao ang kabataan nga nagpangidaron og 9 anyos pataas.
Ngano god tawon nga nagpapressure man si Garin sa mga pulitiko? Kinsa may haniti sa medisina, siya o ang mga magbabalaud? Maayo paturukan og Den�vaxia ang mga tawo nga responsable ani. Otro pod ning WHO wa magtamud sa ilang trabaho nga mobantay unta sa mga bag-ong medisina o vaccine nga madiskobre. Pero wala kuno mag-rekomendar ang WHO. Nagtulod-tulod na. Labi pa ang ang Sanofi Pasteur.
GIBANTAYAN
Aduna karoy gibantayan o gimonitor ang Talisay City Health Office nga 10 anyos nga nagsakit og dengue nga nabakunahan sa maong vaccine pero wala pa makasinati og dengue. Sa dihang gihilantan ang bata, gibaliwala lang sa mga ginikanan kay way kuwarta magpakonsulta og doktor.
Ang bata usa sa mga nabakunahan sa Dengvaxia apan wala sukad ma-dengue. Apan sa dihang nakadungog sa mga balita kabahin aning kontrobersiya sa Dengvaxia, napugos ang mga ginikanan sa pagpanghuwam og kuwarta aron ma-eksamin ang bata sa pribadong doktor. Karon, under monitoring ang pasyente. Tan-awa ra og unsa ang purwesyo nga gihatag ngadto sa mga ginikanan sa mga bata nga nabakunahan niini.