Impeachment vs. CJ Sereno
Nagpadayon ang pagdungog sa impeachment case batok kang Supreme Court Chief Justice Maria Lourdes Sereno sa committee on justice sa House of Representatives.
Ang mga resource persons kun mga testigos sa maong komitiba nag-apil sa mga opisyal sa Supreme Court. Ilang gitug-an ang mga kalapasan nga nahimo ni CJ Sereno.
Samtang wa muatubang si Sereno sa mga sakop sa justice committee, iyang gipanghimakak ang tanang mga pasangil batok kaniya pinaagi sa media. Mao usab ang iyang mga abogado.
Samtang ang mga dumadapig sa chief justice miinsister nga wa siyay nahimong sala ug nga tanan pamulitika lamang apan ang mga kontra niya mobarug nga siya sad-an.
Abi kadto nako og nahukman na sa House justice committee nga adunay sufficient in form and substance ang maong impeachment complaint ni Atty. Larry Gadon. Nganong wa man kini ipresentar ngadto sa plenary aron hukman sa tanang mga sakop?
Tungod kay daghan man ang mga sakop sa super majority siguro nga makumpirmar ang hukom sa committee on justice ug madala na ang impeachment case ngadto sa Senado aron hukman kon sadan ba o dili si Sereno.
Ako nagtuo nga sigurong mahukman sa kadaghanang mga kongresista nga sad-an si Sereno. Ang dili masiguro mao ang hukom sa mga senador nga mao gayuy mga maghuhukom sa impeachment trial.
Angayang masayran nga kining impeachment case usa ka political exercise sa ato pa depende sa baruganan sa usa ka pulitiko, dili ang pagdaug sa legal nga argumento sa duha ka habig. Apan ang dakug impluwensiya mao gayud ang political party.
Nganong dakpon man sa mga tinugyanan sa Land Transportation Franchising and Regulatory Board (LTFRB) ang mga motorcycle-for-hire kun habalhabal nga nagpasakop sa Angkas?
Atong nasayran nga kining pagpamasahero sa mga motorsiklo sama sa habal-habal gidili sa atong gobiyerno. Apan sa daghang mga dapit sa nasud, labi na sa mga mountain barangay ug hilit nga mga dapit, ang habal-habal mao ray mode of transportation.
Tungod niini maayong suportahan nato kining balaudnon, ang House Bill 1215, nga gipangamahanan ni Rep. Pedro Acharon, Jr. (1st District, Cotabato) nga nagtumong sa paghatag sa local government units (LGUs) og gahum pag-regulate sa business operation sa motorcycles-for-hire sa ilang dapit.
Apan bisan niini, ang mga habal-habal dili rehistrado mao nga ang ilang operasyon iligal ug dili covered og insurance.
Kon mahimo kining balaud ang mga operator sa habal-habal mahatagan na og authority sa pagrehistro sa ilang motor isip public transport.
Ubos niining balaudnon nga gitawag og “Motorcycles-ForHire Act of 2016,” ang munisipyo ug siyudad maoy mohatag og franchise sa pag-operate sa motorcycles-for-hire sa ilang dapit. Libre na unyang mamasahero kining mga habal-habal.