I don’t want to wait
Nagpaluto gyud si Jonna sa ilang katabang ug mga pagkaon para nga among bawnon sa pagpangaligo namo sa beach. Mihapit lang mig palit og softdrinks ug mineral water sa usa ka tindahan nga among naagian. Daghan nang nangaligo sa among pag-abot. Tulo ka dagkong swimming pool ang among giadtoan. Duna pay sliding.
Nag-abang dayon sila si Jonna ug Ramir og open cottage. Gitabangan ko sila sa pagpahimutang sa dala namong mga pagkaon ug drinks sa ibabaw sa lamesa.
“Tana, Jane, mag-ilis na ta.”
Giagda dayon ko ni Jonna pagkahuman namog asikaso sa among mga dala. Mapahiyumon kaayo si Jonna. Klaro nga malipayon siya. Mikidhat pa siya nako. Aw, mi-smile ko sab niya. Gipakita ko niya nga nagmalipayon sab ko sa among panagkuyog karon.
Nangadto mi sa dressing room para sa mga babaye aron pag-ilis sa isul-ob namo sa pagpangaligo.
Nagsinabligay sila si Jonna ug Ramir sa tubig sa swimming pool samtang nangaligo sila. Nagpabilin una ko sa sulod sa cottage. Unya mihaw-as si Jonna sa swimming pool. Giduol ko niya ug gikuptan dayon ko niya sa kamot.
“Ka-lonely nimo dinhi, uy, Jane. Tana, mangaligo ta.”
Gibira ko ni Jonna. Nagkatawa na lang ko nga mipaundayon sa akong best friend. Mitimpasaw dayon ming duha sa swimming pool. Gisabligan ko ni Ramir sa tubig. Mibawos sab kog sablig niya. Nagkatawa si Jonna nga nagtan-aw namo ni Ramir nga nagsinabligay sa tubig sa swimming pool. Kalit nawala ang akong kaguol. Nalipay kaayo ko nga gihatagan kog panahon ni Ramir, nga iya kong gilingaw karon.
Nasayop ko sa akong pagtuo nga di ko tagdon pagayo niya kay si Jonna ra ang bililhon kaniya.
Misawom ko. Misawom sab si Rmir ug Jonna. Lawom ang swimming pool nga among gikaligoan. Unya kalit kong gikuptan sa kamot ni Ramir. Wow! Hilom kong nakaingon. Kanindot sa akong gibati niadtong tungora. First tme nga gikuptan ko ni Ramir sa kamot. Unya mitunga si Ramir. Naapil sab ko pagtunga kay wa man niya buhii ang akong kamot.
Gikuha ko ang akong kamot nga gikuptan ni Ramir kay nagtan-aw si Jonna namo. Na, basig masuko si Jonna. Nagtuo ra ba gyud ko nga trato silang duha. Seryuso si Jonna nga nagtan-aw nako.
(SUMPAYAN)