USP-F mikulata sa China; 2-0 sa 2nd AsPac U Games
Human sa taga li-og nga kadaugan batok sa Malaysia atol sa opening day niadtong Miyerkules, wa usay kaluoy nga milampornas ang University of Southern Philippines Foundation (USP-F) Panthers sa China, 107-52, sa ikaduhang adlaw sa pagpahigayon sa 2nd Asia Pacific University Games sa Cebu Colisuem.
Gikan sa sinugdanan hangtod sa katapusan way puas sa ilang pagpangataki ang Panthers batok sa linghod ug nigpis nga China aron i-rehistro ang ilang ikaduhang kadaugan nga naghatag kanila sa temporaryong liderato sa usa ka semanang torneyo.
Balansing nakatampo sa opensa ang tanang Panthers ni coach Albert Aloncillo sanglit ang tanan niyang 12 ka mga players nakatampo sa scoring nga gipangulohan sa 19 puntos ni Aljie Mendez 19 puntos samtang 15 usab ang nahimo ni Kenneth Cada.
Tag 14 usab ang nahatag nila ni Edwin Villarta ug Ynot.
Niadtong Lunes ilang gilubong usab og taga li-og ang Malaysia, 74-35.
Ang china nahagsa sa 0-2 nga baraha human usab kini masakera sa University of San Jose Recoletos Jaguars niadtong Miyerkules.
Karong hapon, makutas nga dalan ang sagubangon sa Panthers sanglit ilang ikaharong ang title-contender USJ-R Jaguars.
Hangtod ning pagsuwat, padayon pang nagsangka ang Malaysia ug University of San Carlos Warriors nga gipildi usab sa University of the Visayas Green Lancers, 92-78.
Kagabii, nagduwa usab ang USJ-R ug UV sa main game nga gihulagwayng preview sa championships.