CAVS WA PAY NAKASANTA
Franchise record nga 13 ka sunodsunod nga daog natupngan
Mipabuto og tres si LeBron James sa katapusang 15 segundos ug mitapos sa duwa nga may 32 puntos sa dihang natupngan sa Cleveland Cavaliers ang ilang franchise record nga 13 ka sunodsunod nga kadaugan, 101-95, batok sa Sacramento Kings kagahapon sa NBA.
Si James kinsa katulo gyud mag-ilis-ilis og sneakers, milangkat usab og 11 ka rebounds ug siyam ka assists nga maoy nagduslit sa rally sa Cavs sa dihang ilang gipapas ang 14 puntos nga labaw sa Kings sa third quarter aron pabiling wala pay pildi sukad niadtong Nobiyembre 11.
Niadtong 2008-09 ug 200910 nga mga season, ang Cavaliers nakapugnit usab og 13 ka sunodsunod nga kadaugan ug ilang suwayan kini pagbuak ang maong record karong Biyernes (Sabado sa Pilipinas) batok sa Indiana Pacers.
Niagi una og kalisod ang Cavs apan ilang gilupig sa lahuta ang Kings sa naghinapos nga bahin. Si Zach Randolp nangulo sa Kings nga may 18 puntos ug 10 ka rebounds samtang si Buddy Hield midugang og 17.
Samtang sa laing duwa, wala maproblema sa Golden State Warriors ang pagkawagtang ni Stephen Curry kinsa wa makaduwa tungod sa angol, human kini yanong midabo-dabo sa Charlotte Hornets, 101-87.
Ning higayona, si Kevin Durant maoy nahimong mahait nga hinagiban sa Warriors pinaagi sa pagpakatap og 35 puntos, 11 ka rebounds ug 10 ka assists.
Kini maoy unang triple-double ni Durant sa karon nga season ug ikaduha sukad siya mitapon sa Golden State. Si Klay Thompson mipuga og 22 puntos, pito niini sa fourth quarter.
Si Curry dili makaduwa sulod sa duha ka semana tungod sa piang niini sa tikod samtang si Draymond Gree padayon pa usab nga nagpaalim sa iyang angol sa abaga.
Gilupig usab sa Pelicans ang Denver Nuggets, 123-114, ubos sa pagpangulo ni DeMarcus Cousins nga mipahagsa og 40 puntos, 12 ka rebounds ug tulo ka blocks. Kini moay ikatulong higayon nga miduwa ang Pelicans nga wala si Anthony Davis.
Ang Boston Celtics nakaipsot sa pagpanghudlat sa Dallas Mavericks, 97-90, bisan pa man sa kakulang niini sa puwersa.
Si Kyrie Irving mipaksit og 23 puntos, 17 usab ang nahimo ni Jayson Tatum kinsa adunay 10 ka rebounds alang sa ikaupat nga sunodsunod nga daog sa Celtics.
Gipildi usab sa New York Knicks ang Memphis Grizzlies, 99-88. Si Courtney Lee mitali og 24 samtang si Kristaps Porzingis nga bag-o pang nakabalik og duwa tungod sa injury mikuhit og 18 puntos.
Gipalyar sa Bucks ang Pistons, 104-100; gipabugnaw sa San Antonio Spurs ang Miami Heat, 117-105, ug gibalian og sungay sa Indiana Pacers ang Chicago Bulls, 98-96.
Gimagic usab sa Orlando ang Atlanta Hawks pinaagi sa overtime, 110-106.