Pito nagpositibo sa drugas

Pito ka mga kawani sa gobiyerno, lima niini nagtrabaho sa Danao City Hall, ang nagpositibo sa paggamit og shabu sa gipahigayon nga usa ka semana nga kinalit nga drug test sa Cebu Provincial Anti-Drug Abuse Office sa upat ka mga local government unit.

Samtang, usa ka maestra sa dakbayan sa Danao usab ang nagpositibo usab sa paggamit og shabu sa buwag nga drug test sa Cpadao niadtong Oktubre.

Si Ivy Remedios DuranoMeca, pangu sa Cpadao, nibutyag nga 843 tanan ka mga empleyado sa usa ka siyudad ug tulo ka mga lungsod sa lalawigan sa Sugbo ang gi-drug test gikan sa Disyembre 1 hangtod sa Disyembre 6.

Kini naglakip sa Danao ug mga lungsod sa Alegria, Consolacion ug Aloguinsan.

Si Meca niklaro ang nagpositibo nga mga kawani kay ipaubos pa sa confirmatory test sa Department of Health sa kaulohan.

Apan nakompirmar na sa Cpadao nga nagpositibo sa paggamit og shabu ang maestra sa high school sa publikong tunghaan sa Danao base sa nadawat niini nga resulta sa confirmatory test gikan sa DOH duha ka semana na ang nakalabay.

Si Meca namahayag nga nakadawat na og kopya sa

confirmatory test ang superintendent sa Danao Division sa Department of Education. Matod niya, tinuon ang degree sa addiction sa maong maestra aron mahibaw-an kon unsa nga level ang programa sa

drug rehabilitation niini. “Then diha pa mahibaw-an kon asa siya dapat low risk ba siya, med or high,” dugang ni Meca.