2 ka ‘killers’ sa magtiayon nasikop

Nasikop na sa mga sakop sa Cebu City Police Office ang duha ka mga suspek sa pagtigbas patay sa magtiayon sa Barangay Guba, siyudad sa Sugbo niadtong Martes sa gabii.

Ang nasikop giila nga si Jovan Magdadaro, live in partner sa anak sa magtiayong Liesyl ug Edwin Bordadora sa Sityo Katibis, nga giingong dunay dakong kasuko kanila.

Lakip sa nasikop ang higala niini nga kauban ni Magdadaro sa pagpanigbas nga si John Lou Ardena.

Ang duha giing mga drug user.

Matod ni Supt. Ryan Devaras, hepe sa Intelligence and Detective Management Bureau (IDMB) nga niangkon si Magdadaro nga ilang giplanohan ang pagpatay sa magtiayon human siya gikasab-an.

Wala matod pa makauyon ang magtiayon sa live-in sa ilang anak nga maoy hinungdan sa kasuko sa suspek.

“Gi amin sa suspek nga ilang gipatay ang mag-asawa kay gikasuk-an daw siya kay wala daw kauyon sa ilang pag live sa anak ani mao to gitabangan nila ug tigbas,” matod ni Devaras

Si Magdadaro pa ang unang nipahibawo nianang gabii nga iyang nakaplagan si Liesyl nga patay na unahan sa pinuyanan niini.

Nagduda sa sinugdan ang mga pulis nga si Edwin ang

killer, apan nianang buntag niadtong Huwebes nakaplagan kini sa mga pulis nga patay.

Ilang gisalikway nga tulis ang motibo kay wa gikuha ang mga butang sa magtiayon, apil na ang kwarta.