6M NGA PLAKA SA SAKYANAN HIMUON SA BAG-ONG SUPPLIER
Duna nay nidaog nga bidder nga mohimo og license plates alang sa sakyanan ug motorsiklo sa nasod.
Ang Land Transportation Office niisyu na og notice of award sa Trojan Computer Forms Manufacturing Corporation ug J.H. Tonnjes E.A.S.T GmbH and Co. KG Joint Venture niadtong Disyembre 1, 2017 isip mananaug nga bidder alang sa pagpalit og mga plaka nga nagbalor og P978.8 milyones.
Gipahibawo kini sa LTO human gisaway ni House Speaker Pantaleon Alvarez si LTO Chief Edgar Galvante nga giingong nagmika sa iyang trabaho sa kapakyas pag-aksyon sa mga suliran sa supply sa license plates.
Kapin sa sayis milyones ka mga plaka sa mga sakyanan ug motorsiklo ang na- backlog sa LTO sa tibuok nasod gikan sa Hulyo 2016 hangtod sa Nobiyembre 2017.
Dinhi sa Central Visayas, si LTO 7 Director Alita Pulga nibutyag nga di mominos sa 83,024 ka mga plaka ang himuonon alang sa bag-ong mga sakyanan nga narehistro sa rehiyon gikan sa Hulyo 2016 hangtod sa Disyembre 2016.
Samtang 136,070 ka mga plaka gikan sa Enero 2017 hangtod kagahapon.
Matod ni Pulga sa Superbalita Cebu nga ang maong mga sakyanan duna nay naka- assign nga mga plaka apan ang orihinal nga license plates kay i- manufacture pa.
Gilaoman nga karong Marso 2018 masugdan og hatod ang pasiuna nga mga plaka gikan sa manufacturer.
Niadtong 2013, gikwestyon sa Commission on Audit ug mga korte ang pagpalit sa LTO og mga plaka alang sa mga motor vehicle ug motorcycle ug ang mga kaso nag-ung-ong hangtod karon. Ang pagpalit og mga plaka alang sa mga sakyanan nga narehistro gikan sa 2014 hangtod sa 2018.
Pagka 2016, ang Korte Suprema niisyu og temporary restraining order nga nagpugong sa LTO ug Department of Transportation and Communication sa pag-release ug pag-apudapod sa 700,000 ka mga plaka nga gitugyan sa Bureau of Customs human ang
supplier-importer sa license plates napakyas sa iyang bayranan nga obligasyon sa BOC.
Sa 700,000, adunay 2,322 ka mga plaka alang sa motor vehicle nga narehistro gikan sa Hulyo 2015 hangtod sa Oktubre 2015 ang ighahatag samtang 15,002 ka mga plaka og motor gikan sa Nobiyembre 2015 hangtod Pebrero 2016 nga mga transaksyon ang ighahatag.
Dihang niasumir ang bag-ong administrasyon ni Presidente Rodrigo Duterte niadtong Hulyo 2016, way gigahin nga pundo alang sa pagpalitog mga plaka alang sa 2016, 2017 ug 2018.
Apan si Galvante nihangyo og dugang pundo nga P400 milyones nga naapil sa pundo sa LTO sa 2017 aron ipadayon ang pagpalit og mga plaka.
Niadtong Nobiyembre sa miaging tuig, si DoTr Secretary Arthur Tugade nitugot sa hangyo ni Galvante ug nipadaplin og P1 bilyones gikan sa pundo sa iyang buhatan.