Kanhi DOH sec. nabunggo

Layo pa man tuod sa tinuod, apan hinayhinayng migimaw na ang timailhan nga posibling adunay anomalusong transaksiyon kalabot niining pagpalit sa nakontrobersiyal nga Dengvaxia vaccines nga mikantidad og P3.5 billion. Kini human misukwahi ang pamahayag ni kanhi health secretary Janette Garin kalabot sa iyang pag-adto sa Paris sa tuig 2015.

Giangkon ni Garin ang iyang pagbisita sa Paris apan iyang gipanghimakak nga nakigkita siya sa pipila ka mga dagkong opisyal sa Sanofi-Pasteur, ang tiggama sa anti-dengue vaccine nga mao ang Dengvaxia nga diay makadaot sa mga bata.

Sa interview sa ABS-CBN sa Mayo ning tuiga, siya miingon nga bugtong ang French health minister ra ang iyang gikahimamat.

Apan unsa ba gud diay nga ang report sa Philippine Ambassador sa France ngadto sa Department of Foreign Affairs (DFA) nagpakita nga lakip sa opisyal nga lakaw ni Garin sa Paris mao man diay ang pagpakighimamat sa usa ka Guillaume Leroy, ang vice president sa Sanofi-Pasteur, sa usa ka panihapon niadtong Mayo 14, 2015.

Ang kopya sa report nga nakuha sa ABS-CBN pinirmahan ni Ambassador Theresa P. Lazaro.

Gawas ni Garin ug Leroy diha pay laing duha ka opisyal sa Sanofi-Pasteur, usa niini nagbase sa Pilipinas.

So, kon way anomaliya sa transaksiyon nganong gusto man itago ni Garin kining iyang pagpakig- meeting sa mga opisyal sa Sanofi-Pasteur?

Matod pa nga sa maong meeting ilang gituki ang presyo sa vaccine, unsaon nga kini mamahimong demand sa Pilipinas ug ang pagpangita og paagi nga malakip kini sa budget. Kinsa may nagtugot ni Garin sa maong transaksiyon? Wa kahay laing taas nga opisyal nga nagpaluyo usab niini? Hinaot nga dili lang kutob ra ni sa imbestigasyon.