Kalainan sa dinad-an

Usahay, bisag unsa pa ka hitsas sa kahimanan ug dako sa sweldo, kung ang mga tigdumala way kabangkaagan pagdala ug pagpadagan sa ilang mamumuo, kasagaran mahi-ubos, manglayas ug di na mobalik.

Gawas sa kliyente nga maoy tumong nga serbisyuhan og baligyaan sa produckto, ang mga trabahanti nga nagpadagan sa negosyo, maoy pinakadakong bahandi sa kada industriya.

Sa gipahigayong pagbansaybansay nga akong natambungan, gipakita ang kalainan sa dinad-an sa usa ka ‘leader’ ug ‘boss’. Akong nakat-unan nga ang mamumuo mas modasig og trabaho og dugay molahutay kung ang iyang supervisor usa ka leader, dili boss.

Dunay kalainan sa pagdala og mamumuo kining duha.

Ang boss ganahan manugo ug mangdikta kay gusto kini nga matuman kanunay iyang pagbuot. Tagsa ra kining manudlo kay mahadlok malabwan. Kusog sab kining maniid sa agi sa iyang mga tawo og daling makapanaway. Kasagaran, dili modawat og rason kay para niya, siya’y mas utukan og mas labaw nga nakahibalo.

Ang boss ganahan magsegi og tabi kay gusto nga pirming paminawon. Kusog sab ni silang manghadlok ug magsegi og hisgot sa problema imbis motampo og huna-huna og solusyon. Gani, duna ni silay kina-iya nga mangangkon sa kadaugan sa uban kay gustong mosikat.

Lahi ang leader, kini siya mas modasig ug mohatag og inspirasyon sa iyang mga tawo para ganahan, paspas og maayong mo trabaho. Mogiya ug motudlo sab ni siya og mga paagi para makab-ot ang mga tinguha sa kompaniya. Dako sab kini sila og dunggan sa pagmaminaw og maayo mangita og paagi para mas mapagaan ug mapasayon ang mga ginbuhaton.

Ang leader kusog makighalubilo sa ilang mga sakop ug dili mahadlok malupigan. Mohatag kini og kahigayunan para molambo. Dili kini magurong kay magtuyok-tuyok para motabang niadtong nagkalisod. Hilom kini ug mapahi-ubsanon bisan sa taas nilang naabot nga kasinatian ug daghang kadaugan.

Kung ikaw usa ka supervisor ug duna kay gidala nga mga tawo, angay kining kalainan sa dinad-an panaminan para sa kalambuan sa tanan.