Mga Paskohanong pasidaan

Alang sa malinawon ug malipayong pagsaulog sa Pasko angay kitang magmatngon. Sa panultion pa di maayong magpatuyang ta sa atong gibati dili kalimtan ang atong tagsa tagsa ka responsibilidad aron kini makab-ot.

Matod sa kapulisan, tungod ning panahon sa Pasko ang mga badlungon nagtamod sa ilang pagtuo nga dunay kuwarta ang mga tawo busa target sila sa ilang mga diskarte. Gawas sa mga local boys ang mga taga laing lugar modayo dinhi sa ato sa pamasin nga makabiktima sab.

Niingon ang kapulisan ang epektibong panagang batok sa mga kiriwan og kamot mao ang pagpakabana. Di sila hatagan ug higayon nga makapamiktima. Sama sa paglikay sa pagpangalahas, pagdala og daghang salapi ug mga mahalong butang sama sa cellphone.

Di man gyud malikayan ang pagdala og cellphone likayi nga mahatagan nimo ug higayon ang mga badlungon nga kini maoy ilang targiton. Sa ato pa kung mogamit ka sa imong cellphone himo-a ni sa luwas nga lugar.

Naa ko’y daghang nakit-an nga kompiyansa kaayong mag text o manawag daplin sa karsada. Pagkadali baya niining labnihon sa nagmotor nga badlungon.

Bisan diha sa mga kan-anan sulod sa mall daghan ta ug makit-an nga mga customers nga kompiyansa kaayo sa ilang mga mahalong butang. Pagka dali ra baya anang kawaton. Sa mga tindahan nga nagduot duot ang mga customer ayaw kalimot sa mga mangunguot ug manglaslasay kay nagsunod sunod ra ba ninyo.

Diha sa atong kabalayan basin target ni sa mga akyat bahay nga naghuwat lang ug higayon kanus-a ka mahinanok. Samot na kung way nagtikaw tikaw kuyaw kung iapil ug kawat ang haligi.

Bitaw, wa na baya’y pili ron ang mga kawatan. Makaagi og hinayhay hasta ang alambri o pisi nga gihaygayan apilon na og hipos. Hasta gani ang planggana di pasayluon.

Samot na ang mga hiniktan nga gihigut kilid sa hayhayan.

PLAZA

Puwerte nang alegriha sa Plaza Independencia nga maoy sentro sa kalihukan sa Pasko sa Sugbo nga gipasiugdahan sa Cebu City Hall.

May pasidaan si Supt. Artemio Ricabo sa mga badlongon nga gustong mamiktima didto.

Basin nakalimot mo nga naa ra sa duol ang Waterfront Police Station. Si Supt. Ricabo nga maoy deputy ni Sr. Supt. Joel Dotia sa Cebu City Police Office, nipasalig nga alerto ang ilang mga pulis sa pagbantay sa mga tawo nga naglingaw lingaw sa Plaza.

Apil nga ilang gibantayan kining mga tawo nga magdala ug armas ug explosibo. Pero sama sa naandan kita nga mosaksi ug mga kalingawan magmabinantayon sa kanunay. Labi na kung magdala mo ug mga bata.