Kay nakasala

Dear Noy Kulas,

Maayong adlaw kanimo ug sa tanang nagsunod sa imong column. Tagoa ko sa alyas nga Titing, taga Cebu pero karon naa nako sa kauluhan nanarbaho. Akong suliran kabahin sa sitwasyon sa pamilya nako.

Naa koy usa ka anak pero dili mi kasado sa inahan. Padung na unta mi magpakasal kon makatigom pero kay nakasala man ko niya, maorag ngitngit na ang paglaom nga makasal mi. Pareho mi sa Cebu nanarbaho sa una. Sa Cebu siya nabuntis ug nanganak. Pero paghuman niya og panganak niundang siya sa iyang trabaho kay adto mamuyo sa ilaha sa Mindanao. Nahabilin una ko sa Cebu kay di pa ko makaundang sa trabaho kay nagbayad pa ko sa utang ug gastos namo sa pagpanganak niya. Bugtong cell phone ug video call lang ang communication namo.

Mga three months pa lang, nakasala na ko diri sa Cebu. Sa dihang nagkagubot na, nahibaw-an na niya, nasuko kaayo siya nako nasakitan ug nibuhi na siya og istorya nga di na ko niya mapasaylo ug madawat pa kay kaduha na nako buhata. Ikaduha na nako nga nabuhat pero katong una 6 years ago, bag-o pa mi nagkauyab ato.

Mao to niapas ko niya sa Mindanao pero wa ko niya atubanga kay puro bakak lang akong isulti. Nahurot na lang ang adlaw nga akong gigahin wa siya makig-estorya bisan gipadayon ko sa iyang pamilya. Matod sa iyang amahan nasakit og maayo ang akong partner sa akong gibuhat. Nibalik na lang ko sa Cebu nga wa mi magkaestorya. Nagduda na hinuon ko nga duna siyay lain.

Ni-chat ka usa sa akoa ang iyang mama. Mag move on na lang daw ko bisan wa mi klarong closure. Sa cell phone ra mi magkaestorya pero parte ra sab sa sustento kay kada buwan ko magpadala sa bata. Ngano kaha nga nakasulti ang iyang mama ato pero ang among pics naa pa sa iyang Facebook mao naglaum gihapon ko hangtod karon. TITING Ting,

Nakasala ka man, huwata na lang nga moabot ang panahon nga makapasaylo siya nimo. Di man sab lalim ang makasala kag kaduha. Kay mahimong sayop ang una, apan ang ikaduha hinanggaw na. Mao nang di dali ang pagdawat ug paghikalimot sa sala.

Pagtigom lang kay basin mokalit lang og abot ang panahon, nya maagumhan mo lang nga gusto mong magminyo, kana kon magkauli mo. Kay basin kadtong sulti sa iyang mama opinyon ra sab to niya base sa iyang obserbasyon sa iyang anak. Pero kon duna nay lain ang ilang anak, dawata na lang, diha ka na mag move on. Sa pagkakaron, paninguha nga makasustento ka sa sa imong anak.

Ayaw lang usab palabi sa paglaum kay basin mahugno ka. Respetuhi kon unsa man ang iyang makab-ot nga desisyon. NOY KULAS