I don’t want to wait
Sa akong paminaw, nahilaw ko sa tinan-awan ni Jonna nako. Nakita man niya nga nagkupot si Ramir sa akong kamot. Apan dali ra ang kaseryuso ni Jonna. Mikatawa na siya.
“Kuput-kupot pa mo sa kamot, ha.”
Morag di ko makatan-aw kang Jonna. Nauwaw gyud ko, uy.
“Si Ramir, ay. Kalit lang nangupot sa akong kamot sa nagsawom pa mi.”
Mipasiplat ko kang Ramir. Mipahiyom siya kang Jonna. Ug si Jonna sab, nindot kaayog pinahiyoman kang Ramir. Wa na lang ko magtingog. Sa tanaw ko sa akong best friend, wa man siya magselos.
“Sige, ha, mouna lang ko ninyo. Moadto ko sa atong cottage.”
Nakatingog ra gyud ko. Wa koy lingi-lingi nga mihaw-as sa swimming pool. Nanarapo dayon ko sa akong tualya pagsulod ko na sa cottage. Milantaw ko kanila ni Jonna ug Ramir. Nagsawum-sawom sila sa swimming pool. Unya nagsinabligay sa tubig. Sweet kaayo sila. Kahilakon ko. Apan di ko angay mohilak. Ako na lang kahay daginuton ni Ramir?
Milingkod ko sa usa ka silya. Miinom kog softdrinks. Unya mikaon ko. Gipahimungtan ko ang fried chicken. Hapit na lang di kini nako usapon. Gigutom ko kay udto na. Wa man tingali gutoma sila si Jonna ug Ramir kay nagpadayon man gihapon sila pagkaligo? Hilom kong nakaingon. Ah, bahala na mo, uy. Basta ako mokaon na gyud.
Pagkahuman kog kaon, miinom kog tubig. Nalantawan ko sila si Jonna ug Ramir nga nagpaingon na sa akong nahimutangan. Da, gipanggutom lagi mo! Nakaingon ko sa akong kaugalingon.
‘Na, pasensiya na lang gyud mong duha, ha. Gigutom gyud ko maong miuna na lang kog kaon ninyo.” Gingisloan ko si Jonna pagsulod na nila ni Ramir sa cottage. “Okey lang, uy, Jane.” Mikidhat si Jonna nako nga mitubag.
Hilom na lang kong nagtan-aw sa duha nga way tingug-tingog nga naniudto. Pagkahuman nilag kaon, giagda ko ni Jonna nga mangaligo mig usab. Mibalibad ko kay gusto pa kong magrelaks sa sulod sa cottage. Miuna paglakaw si Jonna. Sa dayon nang biya ni Ramir, mipasiplat siya nako. Gipahiyoman ko niya. Gipahiyoman ko sab siya.
Samtang ako na lang usa sa sulod sa cottage, usa ka lalaki ang miduol nako.
(SUMPAYAN)