MAKAPAKAGING NGA KADAUGAN
Castro, Eredera miluwas sa Mingla sa G#1 sa Gullas Cup
Kwarta na naging bato pa...
Mao kini senaryo nga nahitabo sa San Fernando sa dihang gihamok sila sa masakit nga kapildihan batok sa Minglanilla Aquastars sa Game One sa best-of-three finals, 70-71, sa 2nd Congressman Samsam Gullas Cup Inter-cities/municipalities 20-under sa Minglanilla Sports Complex niadtong Huwebes sa gabii.
Naglabaw og kuwatro puntos, 70-66, ang San Fernando sa katapusang sais segundos sa duwa ug daw anaa na sa ilang mga kamot ang kadaugan.
Apan ang tres ni Lyle Eredera sa tuong habig sa nahabiling 2.1 segundos maoy nakapahugyaw sa nagpuot nga dumadapig sulod sa Complex ug nakapabuhi sa dugo sa Aquastars, 69-70.
Ning bahina, anaa pa gihapon unta sa San Fernando ang kadaugan apan ang inbound pass niini alang sa fastbreak na-intercep ni Christian Castro kinsa dali usab nga nakakuha og foul niadtong tungora nga maoy naghatag kaniya og duha ka free throws sa charity lane.
Bisan pa man sa hugyaw, kasaba ug kalanog sa abiba, ang 19-anyos nga Castro kalmado ug way pressure nga mipasulod sa duha niya ka itsa nga maoy nagselyo sa kadaugan.
“Gikuyawan ko katong didto pa ko sa pikas korte gi-foul. Pero pag-abot nako sa free throw line, nawala ng pressure. Nag-focus nako sa akong itsa. Siguro gyud ko masud nako ang duha,” matod ni Castro, anak sa kanhi magduduwa sa University of San Jose Recoletos Jaguars nga si Kit Castro.
Apan ang mikawat og sentro sa atraksiyon sa maong kadaugan mao ang tres ni Eredera kinsa mihagpat og 22 puntos ug 16 ka rebounds sa duwa nga igo na kaayong nakapahimo kaniyang best player of the game.
“Mao gyud to among play. Ingon man si coach nga akoy paitsahon. Diri man unta to sa sentro, unya wa man dayon mapasa mao nga niduol ko. Ako dayong giitsa,” saysay usab ni Eredera kansang kaisog ug kakugi nakapadani ni Kongresista Samsam Gullas kinsa kabahin usab sa mga nisaksi sa duwa.
Naglabaw ang Archangels, 61-53, sa pagsugod sa sayong bahin sa fourth quarter, pero ang tulo ka sunodsunod nga turnovers niini nga napahimuslan sa San Fernando maoy nakabali sa momentum sa duwa.
Sa panaghugpong nila ni Shaun Toquero, Pasilan ug Johnson Saramosing, nahagsa ang 11-3 nga rally ug maoy naghatag sa San Fernando og 69-64 nga labaw sa himatyong mga segundos.
Dinhi nagsugod na sa pagpanggawas ang mga tawo dungan sa pagtuo nga nakab-ot na ang kadaugan sa bisitang San Fernando apan sa wala damha, nibali ang intonada sa panagsangka nga maoy mipahugyaw sa mga dumadapig sa Minglanilla.
Kagabii ang San Fernando mao na usab ang mi-host sa Game Two ug kon dunay Game 3 mobalik ang series sa Minglanilla Sports Complex. Mga puntos:
Minglanilla (71) - Edrera 22, Laspuna 15, Enriquez 13, Gilbuena 6, Basister 6, Castro 5, Caparas 4. San Fernando (70)
- Toquero 18, Soreso 17, Saramosing 14, Bolo 8, Intong 6, Pasilan 4, Geraldino 3.