GIPATAY SA TRES

Thunder gipahilom sa Nets; Wizards mipasawop sa Suns

Nagpabuto og three-point bomb si Brandom Ingram sa nahabiling 0.8 segundos aron agakon ang Los Angeles Lakers sa 107-104 nga kadaugan batok sa host Philadelphia 76ers kagahapon sa National Basketball Association (NBA).

Nagtabla ang duwa sa himatyong segundos dihang miaksyon og lusot si rookie Lonzo Ball unya kalit lang mipasa sa bola ngadto sa nabakante nga si Ingram alang sa nakapadaog nga tres.

Nitawag dayon og timeout ang 76ers unya sa pagpadayon sa duwa, nasipyat si Richaun Holmes sa iyang desperadong three-point shot nga mao unta’y makapabali sa resulta.

Ang Lakers mingsaka sa 9-15 nga rekord samtang ang 76ers nahagbong sa 13-11 nga baraha.

Balanseng ataki ang nagpabangon sa Lakers gikan sa 16 ka mga puntos nga pagkalubong diin pito sa ilang mga magduduwa ang ningmugna og dobleng numero nga puntos pinangulohan sa 21 ni Ingram.

Niamot og 16 puntos matag usa sila si Julius Randle ug Fil-Am Jordan Clarkson sa Lakers, nga nakabawi gikan sa lima ka sunodsunod nga kapildihan.

Ang 76ers gipangulohan ni Joel Embiid pinaag sa iyang 33 puntos samtang nitampo og triple-double nga 12 puntos, 13 rebounds ug 15 assists si Ben Simmons.

NETS 100, THUNDER 95

Sa Mexico City, gipakaging sa Brooklyn Nets ang mas inilog nga Oklahoma City Thunder.

Ang Nets, nga ningsaka sa 10-14 nga rekord, gipangulohan ni Caris Levert pinaagi sa iyang 19 puntos samtang nitampo og 17 puntos si Rondae Hollis-Jefferson.

Ang Thunder, nga nahagsa sa 11-13 nga rekord, gipangulohan ni Russell Westbrook pinaagi sa iyang 31 puntos, walo ka rebounds ug unom ka assists.

WIZARDS 109, SUNS 99

Sa Phoenix, nagpakatap og 34 puntos si Bradley Beal aron pangulohan ang kadaugan sa Washington Wizards batok sa host Suns.

Nihatag og saktong suporta kang Beal mao ang kanhi sakop sa Suns nga si Markieff Morris, kinsa nimugna og 21 puntos.

Ang Suns gipangulohan ni TJ Warren pinaagi sa iyang 23 puntos. Ningkombati ang Suns nga wala ang ilang labing sinaligan sa opensa nga si Devin Booker, kinsa adunay angol.

ROCKETS 112, JAZZ 101

Sa Salt Lake City, nimugna og 29 puntos si James Harden samtang niamot og 23 puntos si Ryan Anderson aron pasulbungon ang Houston Rockets batok sa host Utah Jazz.

Nitampo og 18 puntos ug 13 assists si Chris Paul alang sa Rockets.

Ang Rockets, nga ningsaka sa 19-4 nga rekord, wala pa’y pilde nga naa si Paul sulod sa walo ka mga duwa.

Ang Jazz gipangulohan ni Donovan Mitchell pinaagi sa iyang 26 puntos samtang nitunol og 17 puntos si Alec Burks.

/ AP BAYANI: Padulong nang mohansak si Los Angeles Lakers Brandon Ingram, natung-an sa ligong depensa sa Philadelphia 76ers nila ni Joel Embiid (atubangan) ug Jerryd Bayless (sa iyang luyo). Si Ingram maoy nahimong bayani sa kadaugan sa Lakers pinaagi sa...