Di kaha mobali?
Tanang mata sa Cebu City Hall nahipunting karon ngadto sa bag-ong gitudlo nga konsehal sa dakbayan sa Sugbo nga si Renato “Junjun” Osmeña nga maoy gihulip ni Hanz Abella. Niadtong Martes misugod na si Junjun sa iyang official nga function isip konsehal sa dakbayan.
Krusyal kining iyang pagsulod sa konseho tungod kay ang iyang presensiya maoy usa sa makapausab sa kamada sa mayoriya sa konseho tali sa administrasyon ni Mayor Tomas Osmeña nga iyang uyo-an ug sa oposisyon nga Barug Team Rama nga gipangulohan ni Vice Mayor Edgardo Labella?
Sa pagkakaron, kon kolor ang basehan, tabla ang sitwasyon sa konseho (8-8) kay kini gud si Junjun sakop man sa Barug Team Rama nga mao usay iyang gipasilongan niadtong pagdagan niya pagkakonsehal sa milabayng piniliay.
Pero ang nakita karon sa body language ni Junjun daw sihag ug haom siya sa estratihiya ni Osmeña kon unsaon siya pag-agni ug pagkombinsir nga mobali sa pikas habig.
Pananglitan, sa iyang unang pag-atubang sa media isip konsehal, dayag nga mipabuhagay si Junjun nga gusto niyang kuptan ang komitiba sa peace and order ug ang pagdumala sa trapiko kay kini dakong hagit alang kaniya.
Apan mipabuhagay ang iyang mga kaubang oposisyon nga dili lang una maglahugay og chairmanship sa konseho ug busa magpaabot lang una siya kon kanus-a.
Pero sa iyang courtesy call ni Mayor Osmeña niadtong Martes, ang mayor daw sa mipasumbingay na sa kaandam nga mohatag kaniya kon unsay iyang gustong posisyon ug aron dayon kini maka function sa iyang bulohaton.
Dili kaha maagni si Junjun niini kon tanyagan na usab siya nga mamahimong deputy mayor sama sa mga kanhi oposisyon nga anaa na karon sa administrasyon?
Blood is thicker than water, matod pa nila.