Gwen mihimakak sa pasangil ni Ubial
Bakak ang giingon ni kanhi Health secretary Paulyn Jean Rosell-Ubial nga gipugos siya ni Deputy Speaker Gwendolyn Garcia nga dad-on ang dengue vaccination program sa Central Visayas labi na sa Sugbo.
Kini sumala ni Garcia, kongresista sa ikatulong distrito sa Sugbo, nga niingon nga gilusad na ang programa sa wala pa sila magsugod sa budget hearing sa miaging tuig diin nianhi sa Sugbo si Health Undersecretary Gerardo Bayugo alang sa maong katuyoan.
Matod ni Garcia, ang Department of Health una nang nitan-aw nga iapil ang Sugbo gumikan kay nagkuha dinhi og samplings ug tungod sa kataas sa percentage sa pagsaka sa mga insidente sa dengue.
Iya usab gikwestyon kon nganong gipahunong ni Ubial ang pagpatuman sa programa nga duna pay daghang balanse sa mga bakuna sanglit dul-an ra sa 500,000 ka mga bata ang nahatagan sa unang dose unya usa ka milyon ang target.
“Una sa tanan napalit nana ang vaccine, nigasto na ang gobiyerno og P3 billion para ana. As a congressman, naghunahuna man jud ka sa imong constituents labi na kay I was the former governor, nahibawo ko nga ngadto intawon sa kabarangayan dili maka- afford ani ang mga ginikanan,” pahayag ni Garcia sa pakighinabi sa Superbalita Cebu.
Siya nidugang nga dili lang siya ang nihangyo sa DOH nga apilon ang rehiyon 7 tungod kay ang ubang mga kongresista nihangyo usab nga ilakip ang ilang lugar.
Si Garcia nitumbok ni Ubial nga way klaro nga baruganan bahin sa Dengvaxia kay sa dihang kini assistant secretary pa, nisuporta kini sa dengue vaccination program, apan dihang nahimo na nga kalihim, kalit lang kini nausab.
“If secretary of health ka, kasabot ka sa imong obligasyon. Dili gyud ka moingon nga gi- pressure siya kay ikaw gud ang nagkupot, bahin gud ni og kinabuhi sa mga bata. Secretary of health siya unya magbalibali ang iyang position, kuyaw kaayo. It’s dangerous,” dugang sa deputy speaker.
Si Ubial unang nipasangil nga napugos siya nga ipadayon ang pagpamakuna sa Dengvaxia vaccine kay gi- pressure siya og pipila ka mga kongresista ug wala ma- confirm sa Commission on Appointments. “Insulto man na sa CA. She’s trying to say nga gi- pressure siya sa mga congressmen and senators sa CA,” dugang pahayag ni Garcia.
Nahibung usab ang kanhi gobernador sa Sugbo kon nganong siya lang ug si Iloilo 1st District Rep. Richard Garin, bana ni kanhi Health Secretary Janette Garin, ang ginganlan ni Ubial nga giingong ni- pressure niini nga ipadayon ug palapdan ang vaccination program nga bisan si Presidential spokesperson Harry Roque ang usa usab sa mga vocal batok sa programa.